Almatyda tanymal ǵalym Meıiz Qanyshqyzy Sátbaevany este qaldyrý úshin memorıaldyq taqta saltanatty túrde ashyldy. Memorıal Qurmanǵazy, 20 úıdiń qabyrǵasyna ornatyldy.

Meıiz Qanyshqyzy – geologıa-mıneralogıa ǵylymdarynyń doktory. Ol óziniń uly ákesi Qanysh Imantaıuly Sátbaevtyń jolymen júrdi jáne Jezqazǵan ken ornyn ashý jónindegi ǵylymı-zertteý jumystaryn jalǵastyrdy. Quramy renıge baı erekshe ken quraıtyn mıneraldardyń qurylymdyq-morfologıasy boıynsha doktorlyq dısertasıany qorǵady.

Eskertkish taqtany Almaty qalasy ákiminiń keńesshisi Mamaı Ahetov ashty.

«Meıiz Qanyshqyzy – kórnekti ǵalym. Myna memorıaldy taqta búgingi jáne keler urpaqqa ony eske salatyn bolady. Memorıaldyń ashylýy – qalamyzdyń mádenı jáne ǵylymı ómirindegi tarıhı sát», – dedi ashylý saltanatynda M. Ahetov.

Ashylý rásimine QR Ulttyq ǵylym akademıasynyń prezıdenti M. Jurynov, akademıkter S. Ozdoev jáne S. Qojahmetov, geologıa-mınerologıa ǵylymdarynyń doktory E. Seıitmuratova, Q. I. Sátbaev atyndaǵy geologıa Instıtýty arhıviniń dırektory N. Nıretına, Qazaqstannyń eńbek sińirgen qaıratkeri G. Bıbatyrova, Meıiz Sátbaevanyń uly, geologıa-mınerologıa ǵylymdarynyń doktory A. Tretákov qatysty.