Aımaq basshysynyń ókimimen bul laýazymǵa oblys ákiminiń orynbasary mindetin atqarǵan Shalqar Zamanbekuly Baıbekov taǵaıyndaldy. Ol 2017 jyldan beri aýyl sharýashylyǵy, tabıǵı resýrstar, jer qatynastary men veterınarıa salalaryna jetekshilik etti.

Aýdan aktıvine jańa ákimdi Danıal Ahmetov tanystyrdy.

– Shalqar Zamanbekuly óte tájirıbeli basqarýshy. Onyń kandıdatýrasyn máslıhat depýttary biraýyzdan qoldady. Ol óziniń tájirıbesin Besqaraǵaı aýdanyn damytý barysyndaǵy mańyzdy máselelerdi sheshýde qoldanatynyna senimdimin, – dedi Shyǵys Qazaqstan ákimi.

 Aıta ketsek, Shalqar Baıbekov 1967 jyly 6 aqpanda burynǵy Semeı oblysy, Abaı aýdanynda dúnıege kelgen. 1996 jyly Qazaq memlekettik basqarý akademıasyn «Ekonomıka» mamandyǵy, keıin Qazaq memlekettik zań akademıasyn «Zańger» mamandyǵy boıynsha támamdady.

Qyzmet jolyn 1988 jyly Semeı oblysy Jańasemeı aýdandyq ınspeksıasynyń memlekettik saqtandyrýdyń   aǵa ınspektory bolyp bastady.

 1990 jyldyń shilde aıynan bastap Semeı salyq ınspeksıasy salasynda qyzmet etti. 1999 jyly Pavlodar qalasy, keıin Astana men Qaraǵandy qalalarynda Salyq komıtetiniń tóraǵasy bolyp jumys istedi.

2008 jyldan 2014 jylǵa deıin Astana qalasy Salyq departamentiniń  Esil aýdany boıynsha  salyq basqarmasyn basqardy. Keıin Qazaqstan Respýblıkasy Prezıdenti Ákimshiliginiń  memlekettik baqylaý  jáne uıymdyq-aýmaqtyq jumys bóliminiń memlekettik ınspektory boldy.

SHQO ákiminiń baspasóz qyzmeti