Bul týraly Almaty qalasynyń bıylǵy jyldyń 10 aıyndaǵy áleýmettik ekonomıkalyq damý qorytyndylaryna arnalǵan Ortalyq komýnıkasıalar qyzmetindegi baspasóz konferensıasynda Baqytjan Saǵyntaev málim etti.

Almaty ákimi Baqytjan Saǵyntaev qalalyqtardyń ómir súrý sapasyn arttyrýdaǵy birinshi kezektegi másele retinde qalalyq ınfraqurylymdy modernızasıalaýdy qolǵa alǵanyn aıtty.

Ońtústik astananyń 23 yqshamaýdandaryndaǵy 105 myń turǵyn 2023 jyly aýyz sýmen 100% qamtamasyz etilmek. Búginde sý qubylary men káriz jelilerin tartý jumystary bastaldy.

Kóshe jaryǵy – qoǵamdyq qaýipsizdikti qamtamasyz etýge tikeleı jáne janama yqpal etetin faktorlardyń biri.

– Biz qala búdjetin buryn esh jaryǵy bolmaǵan kóshelerdi jaryqtandyrýǵa baǵyttadyq. Qazirgi kezde osyndaı 208 kósheniń syrtqy jaryǵynyń qurylysy aıaqtaldy, – dedi Bakytjan Saǵyntaev.

Keler jyly 1176 kósheniń jaryǵy rettelmek. Osylaısha, syrtqy jaryq deńgeıi 100%-ǵa deıin jetedi.

Aıta keterligi, Almatynyń abattandyrylǵan aýlalarynyń úlesi – 55%. Jyl basynan beri 672 aýlalar abattandyryldy. 2020 jyldan «Meniń aýlam» aýqymdy baǵdarlamasyn júzege asyrý qolǵa alynady. Aýlalardy tolyq abattandyrý taıaýdaǵy eki jyl ishinde aıaqtalady.