Ortalyq komýnıkasıalar qyzmetindegi brıfıńte Almaty ákimi Baqytjan Saǵyntaev shahardaǵy jańa joldyń qurylysy jóninde aıtty.

Almaty ákimdiginiń aldynda turǵan qysqa merzimdi mindet – jaqsy jáne qanaǵattanarlyq jaǵdaıdaǵy joldardyń úlesin 75%-ǵa deıin jetkizý. Búgingi kúni 231 kóshedegi 54 shaqyrym joldyń qurylysy aıaqtaldy.

– Uzyndyǵy 135 shaqyrym bolatyn 147 kóshedegi joldarǵa ortasha jóndeý jumystary júrgizildi. 2020 jyly Almatynyń shetinde taǵy 120 shaqyrym joldyń qurylysy bastalady, – dep naqtylady B. Saǵyntaev.

Almatylyqtar úshin eń ózekti máseleniń biri – qoǵamdyq kóliktiń jumysy. Jolaýshylar tasymalynyń sapasyn arttyrý – almatylyqtardyń ómir súrý deńgeıin jaqsartýdaǵy basty mindetterdiń biri.

– Osyǵan oraı biz qoǵamdyq kólik sanyn arttyramyz. Komersıalyq qurylymdar 172 avtobýs satyp aldy. Qala búdjeti esebinen gazben júretin taǵy 260 avtobýs alyndy, – dedi qala ákimi B. Saǵyntaev jáne jańarǵan avtobýs parkteriniń 90%-ǵa jetkenin naqtylady.

Qalada barlyq troleıbýs jelisin modernızasıalaý bastaldy. Ákimdik qoǵamdyq kóliktiń ekologıalyq taza túrine kóshýge jiti nazar aýdaratyn bolady. Mysaly, kólik óte qajet jáne uzyn baǵyttarǵa 10 elektrobýs shyǵaryldy.