Trenıńtik ortalyqtyń alǵashqy kýrsyna mınıstrler – Eljan Birtanov, Asqat Aımaǵambetov, Erlan Turǵymbaev, Aqtoty Raıymqulova, Birjan Nurymbetov jáne Nur-Sultan ákimi Altaı Kólginov qatysty dep jazady Qamshy.kz aqparat agenttigi sputniknews.kz saıtynyń deregin negizge alyp.

Qazaqstannyń mınıstrleri Amerıka kardıologıa qaýymdastyǵynyń bazalyq júrek reanımasıasy kýrsynan ótti, dep habarlady densaýlyq saqtaý mınıstrliginiń shuǵyl medısına boıynsha ulttyq úılestirý ortalyǵy.

Sonyń negizinde bazalyq jáne keńeıtilgen júrek reanımasıasyn (BLS, ACLS) oqytýdan halyqaralyq trenıńtik ortalyq ashylǵan bolatyn. Amerıka kardıologıa qaýymdastyǵynyń akredıtasıasynan ótken ondaı ortalyq TMD aýmaǵynda alǵash ret ashylyp otyr.

Halyqaralyq trenıńtik ortalyq Qazaqstan halqynyń qan aınalymy júıesi aýrýlaryn, sonyń ishinde emdeýge deıingi kezeńde ólim-jitimdi azaıtý úshin ashylǵan. Negizgi maqsaty –  biryńǵaı standarttar boıynsha medısına qyzmetkerlerin, sondaı-aq respýblıka halqyn bazalyq reanımasıa (BLS) sharalaryn kórsetýge úıretý.

Ortalyqtyń alǵashqy kýrsynan Qazaqstannyń densaýlyq saqtaý mınıstri Eljan Birtanov, ǵylym jáne bilim mınıstri Asqat Aımaǵambetov, ishki ister mınıstri Erlan Turǵymbaev, mádenıet jáne sport mınıstri Aqtoty Raıymqulova, eńbek jáne halyqty áleýmettik qorǵaý mınıstri Birjan Nurymbetov jáne Nur-Sultan qalasynyń ákimi Altaı Kólginov ótti.

"Qazaqstannyń aýmaǵynda halyqaralyq trenıńtik ortalyq qurý shuǵyl medısına, tótenshe jaǵdaılar qyzmeti jáne quqyq qorǵaý organdary qyzmetkerleriniń bazalyq jáne keńeıtilgen reanımasıasyn kórsetýdi úzdiksiz jáne sapaly oqytýdyń senimdi júıesin qurýǵa múmkindik beredi", - deıdi densaýlyq mınıstri Eljan Birtanov.

Aıta keteıik, Amerıka kardıologıa qaýymdastyǵy (AHA) kardıologıa salasynda medısınalyq zertteýlermen, kardıologıalyq aýrýlardan týyndaǵan múgedektik pen ólim-jitimdi tómendetý maqsatynda tıisti medısınalyq kómekke yqpal etetin salaýatty ómir salty týraly bilim berý jobalarymen aınalysatyn AQSH-taǵy komersıalyq emes uıym bolyp sanalady.