Elimizdegi tuńǵysh qýyrshaq teatrynyń kásibı deńgeıi, elimizde jáne shet elderde ótken respýblıkalyq, halyqaralyq teatr festıválderinde top jaryp júrgendigi de kásibı mamandar men kóreremenderdiń nazarynda. Eresekterge arnalǵan jańa qoıylymdarymen túrli halyqaralyq teatr festıválderinen júldeger atanyp júrgen ujym kishkentaı kórermender úshin usynatyn ertegiler men qoıylymdardy nazarynan tys qaldyrǵan emes. Kerisinshe, qýyrshaq teatry atqarýy tıis óz mısıasyn atqarýdy esten shyǵarmaıdy. Atap aıtqanda, bıylǵy maýsymda teatr óziniń ekinshi balalarǵa arnalǵan qoıylymyn kórermenderge usyndy. Búldirshinderdiń kóz qýanyshy qýyrshaq teatrynyń 85-shi maýsymynyń alǵashqy premerasy – «Aýyl ıti Aqbaı» (avt.: T.Mınýllın, rej.: E.Qabdyl) qoıylymy. Týǵan jeriń men ósken ortanyń qadirin bilýge, qanaǵat etýge úndeıtin jarqyn áýendi qoıylym búginde repertýardan turaqty túrde óz ornyn alǵan.

Eki tilde kórermen suranystaryn qanaǵattandyryp otyrǵan teatr «TEATR BEZ OTPÝSKA» atalyp, kórermenderi úshin toqtaýsyz jumys atqaryp jatqaly biraz ýaqyt boldy. Tájirıbelerden tiksinbeıtin teatr qýyrshaq óneriniń kópshilikke beımálim qyrlaryn ashyp, álemdik deńgeıge qulash urǵaly bul óner salasyna qyzyǵatyn kórermender de, jumys jasaýǵa usynys bildirgen jas artıser men rejıserlar da bar.

Baldyrǵandardyń jan-jaqty azamat bolyp qalyptasýyna óz úlesin qosyp kele jatqan respýblıka tarıhyndaǵy tuńǵysh Qýyrshaq teatry balalarǵa arnalǵan ekinshi qoıylymnyń tusaýkeserine daıyndyq ústinde. Basty maqsaty – dástúrli ulttyq qýyrshaqtarymyzdy jańǵyrta túsý. Jańa qoıylymnyń rejıseri, prodússer, Reseı Federasıasy Teatr qaıratkerleri Odaǵynyń múshesi, Halyqaralyq «KÝKART» teatr festıvaliniń prezıdenti – Davıd Býrman. Teatr artıseriniń izdenisi men qýyrshaq júrgizýdegi kásibı deńgeılerin arttyratyn qoıylym aǵymdaǵy jyldyń 5-6 jeltoqsan kúnderi alǵashqy kórsetilimin kópshilik nazaryna usynady.

Kishkentaı kórermenderimizdiń súıikti oqıǵasy «Aqqutan men qaraqshy» ertegisiniń jelisimen «Aıko men Strashko» spektakli sahnalanady. Ózgeniń adal eńbegin paıdalaný úlken qatelik ekendigin, meıirimdilik qasıetin joǵaltpaýymyz kerektigine úndeıtin kishkentaı qutan men egistikti kúzetetin qaraqshynyń oqıǵasy balǵyn búldirshinderge jaǵymdy áser syılary anyq.

Esterińizge sala ketsek, teatr ujymy aǵymdaǵy jyldyń maýsym aıynda Reseı Federasıasy, Sankt-Peterbýrg qalasynda ótken «KÝKART» Halyqaralyq teatr festıvaline «Ana júregi» (avt.: E.Ionov, rej.:A.Zaısev) spektaklimen shaqyrtý alyp, óner kórsetken bolatyn. Atalmysh óner beıgesinde eki birdeı nomınasıany qanjyǵasyna baılaǵan ujymǵa erekshe yqylas tanytyp, festıvál prezıdenti Davıd Semenovıch teatrymyzǵa arnaıy at basyn burdy. Jańashyldyqqa jany qumar qýyrshaq teatrynyń repertýaryn jańa qoıylymmen tolyqtyrý mártebesi ıe bolǵanyna erekshe yqylasyn jetkizdi.

Óner jasaýshylar men olardy nasıhattaýshylarǵa shynaıy janashyrlyqpen qarap, teatrdyń órkendeýine barlyq qajetti jaǵdaıdy usynyp otyrǵan shyǵarmashylyq top eńbegi, teatr basshylyǵynyń jańa kózqaraspen jumys jasaýy qýyrshaq teatrynyń sahnasynan áli talaı tyń dúnıeler men kórermen kóńilinen shyǵatyn qaıtalanbas qoıylymdar kórerimizge dálel.

Rejıser men avtordyń aıtýly eńbegin jáne akterlik ansámbldiń potensıalynyń joǵarylyǵyn dáleldeıtin jańa qoıylymnyń qadirli qonaǵy bolyńyzdar.

Beıbit Álkeeva