İshki ister mınıstriniń birinshi orynbasary Marat Qojaev alıment tóleýden jaltaryp júrgen ákelerge qoldanylatyn sharalardy qatańdatýdy usyndy, dep habarlaıdy Qamshy.kz aqparat agenttigi.

Búginde alıment tólemeıtin azamattardy izdeý polısıa bólimderiniń quzirettiliginde. Olar alımentshiniń turǵylyqty jeri boıynsha izdeıdi. 2018 jyly 1864 alımentshige izdeý salynyp, 78-i tabylǵan. Iaǵnı 9 paıyzy ǵana. Qalǵandaryn izdeý toqtatylǵan.

Marat Qojaevtyń sózinshe, alıment isi azamattyq-quqyqtyq qatynas negizinde qaralatyndyqtan, qaryzdan jaltarýshylardy izdeýde qylmyskerdi izdegendegideı tásilder qoldanylmaıdy.

"Sáıkesinshe qoldanystaǵy mehanızm alımentshini mindetin oryndaýǵa májbúrleı almaıdy. Sondyqtan ákimshilik kodekske alımentshige jaýapkershilik júkteıtin, qajetine qaraı qamaýǵa, máselen 5 kúnge qamaýǵa múmkindik beretin ózgerister engizý qajet", deıdi ishki ister mınıstriniń birinshi orynbasary.

Osy rette máseleniń sheshimderiniń biri retinde Ádilet mınıstrligi Italıa tájirıbesin zerdelep jatqanyn habarlady. Oǵan saı, bereshegi bar azamattyń qaryzy onyń áke-sheshesine mindetteledi.

Qazaqstanda azamattyq quqyq buzýshylyqtyń 35 paıyzy alıment isi boıynsha qozǵalady. Orta eseppen jylyna 200 myń is qaralady. 13 myń is problemalyq bolyp tanylǵan. Ol ister boıynsha bereshek somasy 5,7 mlrd teńgeni quraıdy.