Mysyrda jumbaq jaǵdaıda kóz jumǵan Qazaqstan elshiliginiń qyzmetkeri Elaman Joldasovtyń denesi elge Jańa jylǵa deıin jetkiziledi. Bul týraly búgin syrtqy ister mınıstri Muhtar Tileýberdi aıtty, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp.
Úkimet otyrysynan keıin jýrnalıser mınıstrden Elaman Joldasovtyń denesi elge qashan jetkiziletinin surady.
"Jańa jylǵa deıin, osy aptanyń sońy nemese kelesi aptada denesi elge jetkiziledi dep otyrmyz", - dedi Tileýberdi.
Mınıstrdiń aıtýynsha, elshilik qyzmetkeriniń jumbaq ólimine qatysty tergeý áli aıaqtalmaǵan. Tergeý nátıjesi qazaqstandyq tarapqa berilgen joq.
"Kúte turaıyq. Tergeý materıaldary qazir Mysyrdyń bas prokýratýrasynda, sol eldiń syrtqy ister mınıstrligi arqyly bizge beriledi", - dedi ol.
Tileýberdiniń sózinshe, elshilik qyzmetkeriniń neden qaza bolǵanyn aıtý qazir qıyn.
"Biraq, sýısıd eń birinshi versıa retinde qarastyrylyp jatyr", - dedi mınıstr.
Pikir qaldyrý