Búgin Taraz qalasynda Jambyl oblysynyń 80 jyldyq mereıtoıy saltanatty túrde toılanyp jatyr. Mereıli dataǵa arnalǵan sharalar barysynda birqatar eskertkishter men mádenı nysandar paıdalanýǵa berilmek.

Jambyl oblysynyń 80 jyldyǵyna arnalyp ashylǵan rýhanı nysandardyń alǵashqysy - Asqar Toqpanovtyń eskertkishi. Oblystyq qazaq drama teatrynyń negizin qalap, ondaǵy shyǵarmashylyq ujymynyń kásibı biliktiligin jetildirýge óz qoltańbasyn qaldyrǵan rejıserdiń músini óner ordasynyń aldyna qoıyldy.

Eskertkishtiń lentasyn KSRO jáne Qazaqstannyń Halyq ártisi, Qazaqstannyń Eńbek Eri Asanáli Áshimov pen  Qazaqstan Teatr qaıratkerleri odaǵynyń tóraǵasy, Asqar Toqpanovtyń shákirti, Qazaqstannyń Halyq ártisi  Tuńǵyshbaı Jamanqulov qıdy. Olar tulǵa týraly esti estelikteri men taǵylymdy oılaryn ortaǵa salyp, A.Toqpanov eskertkishiniń  oblystyq teatr aldyna qoıylǵany óte oryndy sheshim bolǵanyn basa aıtty.

Sondaı-aq shara barysynda A.Toqpanovtyń ómiri men shyǵarmashylyǵy jónindegi «Toqpanov tulǵasy» atty estelik kitaptyń tusaýkeser rásimi ótti. Qonaqtar úshin A.Toqpanovtyń qyzmet joly, eńbekteri, nagradalary, shákirtteri jaıly fotostend uıymdastyrylyp,  tulǵa týraly derekti fılm kórsetildi.

Eske sal ketsek, búginde Jambyl oblystyq qazaq drama teatryna qazaqtyń tuńǵysh kásibı rejıseri, halyq ártisi Asqar Toqpanovtyń esimin berý boıynsha tıisti jumystar júrgizilip jatyr. Respýblıkalyq onomastıkalyq komısıadan qoldaý tapqan bul usynys  boıynsha qazir Úkimet qaýlysynyń jobasy daıyndalýda.

Oblys teatryna tulǵanyń esimin berý — ónersúıer qaýymnyń kópten bergi arman-tilegi bolatyn. Óıtkeni qazaq óneriniń damýyna ólsheýsiz úles qosqan tulǵa óz eńbek jolynda Jambyl oblystyq qazaq teatrynda da eleýli eńbek etken. Kóptegen qoıylymdar sahnalap, shákirtter tárbıelegen.

Bul usynysty osydan 10-15 jyl buryn Asanáli Áshimov, Sábıt Orazbaev, Tuńǵyshbaı Jamanqulov sekildi teatr sańlaqtary kóterip, usynys hat jazǵanymen, jaýapsyz qalǵan edi. Oblys ákimi Asqar Isabekuly osy máseleni Úkimet, Mádenıet mınıstrligi deńgeıinde kóterip, ıgi bastama óz sheshimin tabýda.

A. Toqpanov esimi buǵan deıin elimizde eshqandaı teatr men óner ujymyna berilmegen. Al  1936 jyly qurylǵan oblystyq qazaq drama teatry osy jyldar boıy birde-bir tulǵanyń atymen atalmaǵan. Osy turǵydan alǵanda bul bastama kópshilikten zor qoldaý tabýda.

Teatr rejıseriniń músinin belgili músinshi Momysh Sultan jasap shyqty. Onyń qurylysyna tanymal mesenat «Super pharm» jaýapkershiligi shekteýli seriktestiginiń dırektory Qaırat Qaımoldaev demeýshilik etken.