Sońǵy ýaqytta áleýmettik jelilerde «Araltuz» AQ óniminiń sapasy týraly taralyp jatqan túrli aqparatqa qatysty "Araltuz" kompanıanyń prezıdenti Aıdynbek Taýasarov pikir bildirdi. Ol Qyzylorda oblystyq ishki saıasat basqarmasynyń Feısbýktegi paraqshasynda jarıalandy.

"Araltuz" tuzy quramynda tabıǵı mıneraldardan – epsomıtterden jáne astrahanıtterden turatyn tabıǵı erimeıtin tunba bar, olar aǵza úshin absolút beıtarap bolyp tabylady. Óńdeýge kelip túsetin shıkizat – ekologıalyq taza. "Araltuz" AQ barlyq ónimderin EAEQ aýmaǵynda akkredıttelgen táýelsiz zerthanalar tekseredi, osy zerthana tıisinshe sáıkestik deklarasıasyn bergen. Biz "Araltuz" AQ as tuzynyń ekologıalyq taza bolyp tabylatynyn jáne álemdik standarttarǵa sáıkes keletinin senimdilikpen málimdeı alamyz" delingen A. Taýasarov málimdemesinde.

1925 jyldan bastap as tuzyn óndirip kele jatqan kompanıa ónimi Qazaqstanmen qatar TMD elderinde suranysqa ıe. Qazir kásiporynda 1200-den astam jergilikti turǵyn eńbek etedi.

Aıdynbek Taýasarov "Araltuzdyń" menshik ıeleri kompanıa qurylǵannan beri qazaqstandyq kásipkerler bolyp kele jatqandyǵyn atap ótken. Qazirgi tańda da kásiporynnyń 100 paıyz aksıasy qazaqstandyq kásipkerlerge tıesili. Kásiporyn eshqandaı qytaılyq tarapqa satylmaǵan jáne úlesine qytaılyqtar qosylmaǵan.

Osyǵan sáıkes, "Araltuz" AQ sońǵy ýaqytta áleýmettik jelilerde taratylyp jatqan aqparattyń shyndyqqa sáıkes kelmeıtinin resmı málimdeıdi.

"Araltuz" AQ ónimderi QR ST MEMST R 51574- 2003 «Qaınatylǵan as tuzy. Tehnıkalyq sharttar» standartyna qatań sáıkestikte shyǵarylady. Kompanıa ISO 9001, ISO 22000, HACCP jáne halal sertıfıkattaryna ıe.

Ónimderdi aýysym-aýysymmen shyǵarý kezinde, joǵaryda kórsetilgen standarttyń 5.9 t. sáıkes kem degende 6 saǵatta bir ret sertıfıkattalǵan zerthanada tuzdyń sapasy tekseriledi. Kompanıa tuzdyń organıkalyq jáne fızıkalyq-hımıalyq kórsetkishteri synaqtarynyń nátıjelerin turaqty túrde tirkep otyrady. Sonymen qatar, "Araltuz" AQ barlyq ónimderin EAEQ aýmaǵynda akkredıttelgen táýelsiz zerthanalar tekseredi, osy zerthana sáıkestik deklarasıasyn bergen.

"Araltuz" AQ óndiretin as tuzy ekologıalyq jaǵynan taza jáne álemdik standarttarǵa sáıkes ónim.

Sondaı-aq áleýmettik jelilerde "Araltuz" AQ-nyń áleýmettik máseleler jónindegi vıse-prezıdenti Áýezhan Naǵashybaıdyń máseleniń anyq-qanyǵyn aıtqan vıdeojazbasy taralýda.

Áýezhan Naǵashybaı vıdeoda kásiporynnyń Qytaıǵa satylyp ketti, onda qytaılyqtar jumys jasap jatyr, tuz quramyna adam densaýlyǵyna zıandy qospalar qosylýda degen aqparattardy joqqa shyǵardy.