Iran bıligi ýkraınalyq Boeing 737 jolaýshylar ushaǵy apatynyń sebepterin anyqtaýǵa amerıkalyq mamandardyń aralasýyna ruhsat berip, AQSH-tyń kólik qaýipsizdigi jónindegi ulttyq keńesiniń ókilin arnaıy komısıa qataryna qosty, dep jazady Qamshy.kz aqparat agenttigi golos-ameriki.ru saıtynyń deregin negizge alyp.

Sondaı-aq  qulaǵan ushaqta azamattary bolǵan Kanada da komısıa quramyna óz sarapshysyn qosty.

Azamattyq avıasıa jónindegi halyqaralyq uıymnyń ırandyq ókili Farhad Parvaresh ushaq bortynda Aýǵanstan men Shvesıa azamattary da bolǵandyqtan, atalǵan elderdiń ókilderi de komısıa quramyna enýi múmkin ekenin aıtty.

Apatty tergeýge fransıalyq mamandar da jumyldyrylýy yqtımal. Óıtkeni ushaq qozǵaltqyshy Fransıada jasalǵan.

Sondaı-aq Parvaresh ushaq atyp túsirilgen bolýy múmkin degen AQSH málimdemesin teristep, Iran memleketiniń ashyq tergeý júrgizýge ázirligin jetkizdi. Onyń sózinshe, qandaıda bir qorytyndy jasaýǵa áli erte.

176 adamnyń ómirin jalmaǵan qaıǵyly oqıǵa ırandyqtardy da kúızeltkenin aıtqan ol qaıtys bolǵandardyń otbasylaryna kóńil aıtyp, apatty óńirdegi saıası shıelenispen baılanystyrmaýǵa shaqyrdy.