Qazaqstannyń halyq ártisi Tuńǵyshbaı Jamanqulov  “halyq qarjysyna negatıvti fılmderdi túsirýdi toqtatýǵa” shaqyrǵan Mádenıet jáne sport mınıstri Arystan Muhamedıdi sabyrlyqqa shaqyrdy. Bul týraly  «Qamshy» portaly qazaquni.kz-ke silteme jasaı otyryp  habarlaıdy.

Mádenıet mınıstri «Qazaqstandy masqaralaıtyn» dep qara tizimge engizgen kıno jaıynda pikirin bildirip, jurtshylyqty taǵy bir dúrliktirgen edi.

Aıtýynsha, Emır Baıǵazınniń «Úılesimdilik sabaqtary», «Rıeltor», Ádilhan Erjanovtyń «Qojaıyndar» atty týyndalaryn shetel túgili elde kórsetýge qarsy. Bir adam kórmegen osy fılmder halyqaralyq baıqaýlardan top jaryp jatqanyn elegisi kelmeıtin mınıstrge, ónerdegi áriptesteriniń ókpesi de qara qazandaı.

QR Halyq artısi Tuńǵyshbaı Jamanqulov elimizdiń mádenıet jáne sport salasyna jaýapty sheneýnikke: “Bálkim, mınıstr inimiz oılanar, tolǵanar. Bul alashapqyn dúnıemenen dyrdýlap, ala shaýyp, qyryp tastaımyn, alyp tastaımyn degenmen dúnıe bitpeıdi. Kerisinshe kásibı mamandardy baǵalaý kerek. Solarmen aqyldasý kerek. Bárin bile berý múmkin emes qoı”, – degen keńesin berdi.

Budan bylaı Mádenıet mınıstri endi búdjet aqshasyna «Qazaqfılm» túsiretin týyndylardy jeke ózi baqylaýǵa almaq.

Arystanbek Muhamedıuly jas rejıserlerdiń azǵyndyqty, qoǵamnyń kóleńkeli tustaryn emes, eldegi jaqsylyqty kóbirek nasıhattaǵanyn qalaıdy. Tipti taqyrypty da ózi taýyp berip, atys-shabystyń ornyna mıllıonerler jaıly kıno túsirýge keńes berdi.

Nurzat Toǵjan