Mundaı pikirdi QR Prezıdenti janyndaǵy Qazaqstannyń strategıalyq zertteýler ınstıtýtynyń jetekshi ǵylymı qyzmetkeri Almas Arzyqulov bildirdi, dep habarlaıdy QazAqparat
«Sońǵy kezde Armenıa, Qyrǵyzstan, Belarýs, Reseıde tirkeýde turǵanymen elimizde júrgen kólikterge qatysty keleńsiz jaǵdaı týyndaǵan bolatyn. Aldymen İshki ister mınıstrligi mundaı kólikterdiń elimizde júrýine tyıym salynatyndyǵyn nemese júrýine 1 jyl ǵana ruqsat beriletindigin aıtty. Al búgin Prezıdent 1 aqpanǵa deıin elimizge kirgen mundaı kólikter ýaqytsha tirkeýge alýdy jáne ony sheshýdi İshki ister mınıstrligine tapsyrdy. Biraq, bul ýaqytsha ǵana sheshim. Ýaqytsha tirkeý kelesi jyldyń 1 naýryzyna deıin ǵana. Osy ýaqytqa deıin barlyq kólik ıesi memleketke tólenetin tólemderin tólep, kólikterin qazaqstandyq tirkeýge ótkizýi kerek. Tirkemese kóligin ákelgen jaǵyna jetkizýi tıis», - dedi sarapshy.
Onyń atap ótýinshe, búginde elimizde 170 myńǵa tarta sheteldik nómirdegi kólik bar. Mine, osy kólikterdiń ıeleri jol erejesin jıi buzyp jatady.
«Árıne, kez kelgen kólik ıesi jol erejesin buzýy múmkin. Biraq, Qazaqstanda tirkelgen kóliktiń ıesine mekenjaıy boıynsha aıyppul keledi. Al sheteldik nómirli kólikterge aıyppul salynǵan kúnniń ózinde ony kimnen óndirip alý máselesi týyndaıdy. Ótken jyldyń sońyna deıin sheteldik nómirli kólikterge 1 mlrd teńgege jýyq aıyppul salynǵan eken», - dedi ol.
Sonymen qatar Almas Arzyqulov Qazaqstan azamattary Armenıadan kólik alyp kelgen kezde zańbuzýshylyqqa baratyndyǵyn aıtady.
«Armenıadan kólik alý úshin siz sol elde tirkeýde turýyńyz qajet. Al bizdiń azamattar sol jaqqa baryp, ýaqytsha jalǵan tirkeýge turý arqyly kólik alyp kelip júr. Munyń ózi de zańbuzýshylyq. Sondyqtan ony da toqtaý qajet. Jol erejesi týraly zańymyzdyń 63 jáne 65-baptarynda kez kelgen syrttan keletin sheteldik avtokólik Qazaqstan aýmaǵyna kirgennen keıin 10 kúnniń ishinde tirkeýge turýy kerektigi jazylǵan. Al shetelden kólik satyp alǵan azamattardyń eshqaısysy zańnyń bul babyn oryndap otyrǵan joq. Kólik sheteldik nómirde, ózderi Qazaqstan azamattary bolǵanymen kóligin tirkeýge qoımaǵan. Al bizdiń zańda sheteldiń azamaty ǵana Qazaqstanǵa kóligin ýaqytsha ákelip, júrgize alatyndyǵy kórsetilgen», - dedi ǵylymı qyzmetker.
Onyń atap ótýinshe, osyndaı jaǵdaıda Qazaqstan Prezıdenti sheteldik nómirli kólikpen júrgen el azamattaryna úlken múmkindik jasap otyr.
«Mine osy daýly máselege Prezıdent núkte qoıdy dep aıtýǵa bolady. Avtokólik ıelerine 1 jylǵa múmkindik berilmek. Iaǵnı kedendik baj ben ýtılızasıalyq somany birden tóleı almaıtyn azamattarǵa 1 naýryzǵa deıin qarajat jınap, sodan keıin kóligin tirkeýge jaǵdaı jasaldy. Bul rette Memleket basshysynyń halyqtyń áleýmettik jaǵdaıyn qaperge alyp otyrǵandyǵyn aıta ketken oryndy», - dedi Almas Arzyqulov.
Aıta keteıik, búgingi Úkimettiń keńeıtilgen otyrysynda Memleket basshysy Qasym-Jomart Toqaev Qazaqstannyń zańnamasyna saı kelmeıtin sheteldik kólikterge qatysy máseleni sheshýdi tapsyrǵan bolatyn.
Marlan Jıembaı
