"Nur Otan" partıasy tóraǵasynyń birinshi orynbasary Baýyrjan Baıbek bastaýysh partıa uıymdary ókilderimen kezdesýinde partıanyń aldaǵy ýaqyttaǵy josparlarymen bólisti.

Onyń aıtýynsha, Elbasynyń tapsyrmasy boıynsha "Nur Otan" partıasy Úkimetpen birigip jergilikti erekshelik pen halyqtyń naqty qajettilikterin esepke ala otyryp, aımaqtyq baǵdarlamalardy daıyndaý boıynsha júıeli jumys júrgizip jatqan kórinedi. Nurotandyqtar barlyq problemasy kóp beketterdi, sonyń ishinde, shalǵaı aýdandar men aýyldardy qamtýdy josparlap otyr.

"Biz ár aýdan úshin partıanyń jeke baǵdarlamasyn ázirlegimiz keledi. Jergilikti jerdegi máseleler men suranystarǵa basymdyq bersek deımiz. Biz halyqtyń kóńili qalaıtyn naqty máselelerdi sheshkimiz keledi. Ekinshiden, biz kandıdattarymyzdy praımerız, ıaǵnı, partıa ishindegi irikteý arqyly usynǵymyz keledi. Munyń barlyǵy ashyq debat túrinde ótkiziletin bolady. Tıimdi máslıhat qalyptastyrǵymyz keledi. Sondyqtan Nur Otan partıasynyń mindeti kreatıvti oılaıtyn, ashyq-jarqyn jandardy usyný bolyp tabylady. Sondaı-aq, bizdiń qyz-kelinshekter men jastardy belsendi qoldap, kótermeleıtin bolamyz. Bul Elbasy Nursultan Nazarbaev pen el Prezıdenti Qasym-Jomart Toqaevtyń tikeleı tapsyrmasy. Áıelderdiń 30%-y men jastardyń 20%-y máslıhattardyń barlyq deńgeıinde bolýy tıis",- dep atap ótti Baýyrjan Baıbek.

Partıalyqtarǵa arnap uıymdastyrylǵan oqytý trenıńterine qatysa otyryp, Nur Otan partıasy Tóraǵasynyń Birinshi orynbasary sondaı-aq, dárigerler olardyń týystary men jaqyndaryn qutqaryp qalǵan oqıǵalarmen áleýmettik jelilerde bólise otyryp, aq halatty abzal jandardy qoldaýǵa shaqyrdy.

"Biz dárigerlerdi qoldaýymyz qajet. Árkim dárigerlerdiń olardyń týystary men jaqyndaryn qalaı qutqaryp qalǵany týraly áńgimelesin. Bul óte kúrdeli moraldyq qoldaý bolyp tabylady. Jeke mamandarǵa, basshylarǵa qatysty máselelerdiń bolatyny da sózsiz. Biraq jaǵdaıdyń 99%-ynda dárigerler adamdarǵa kómektesip, olardyń ómirin qutqaryp otyr, alaıda keıbireýler sekildi ózderin jarnamalamaıdy. Úndemeı ǵana jumys isteıdi. Sonymen qatar, muǵalimderdi, memlekettik qyzmetkerlerdi, polısıa qyzmetkerlerin de qoldaýymyz kerek dep esepteımin. Tańerteńnen keshke deıin jumys istep, keıde tipti otbasylaryna kóńil bólýge ýaqyttary bolmaıdy. Birde memlekettik qyzmetke opozısıadan adam shaqyrǵany esimde. Biraq ol apta da shydaı almady",- dep aǵynan jaryldy Baýyrjan Baıbek.

Aıta ketetin jaıt, partıalyq "qaıta jańǵyrý" aıasynda Saıası menedjment mektebi 10 myńnan astam nurotandyqtarǵa arnap oqytý semınaryn bastady. Aımaqtyq fılıaldardyń, bastaýysh partıa uıymdarynyń ókilderi men pılottyq partıa ishindegi kadrlyq irikteý jeńimpazdary tulǵalyq quzyretti damytý, halyqpen jáne azamattyq qoǵam ınstıtýttarymen tıimdi ózara áreket etý, daǵdarystyq baılanys jáne t.b. salada mashyqtaný deńgeıin arttyrý boıynsha trenıńterge qatysýda.