2021-2022 jyldary eldegi 885 aýylǵa keń jolaqty ınternet tartylady. Bul týraly Qazaqstan Respýblıkasy Sıfrlyq damý, qorǵanys jáne aeroǵarysh ónerkásibi mınıstrligi departamentiniń dırektory Gúlnar Bókeeva málimdedi.

Onyń aıtýynsha, elde jalpyǵa birdeı deklarasıalaýdy engizý kezinde keń jolaqty ınternetke qoljetimdikti qamtamasyz etý mańyzdy. Qazirgi ýaqytta keń jolaqty ınternet barlyq iri qalalarda, oblys ortalyqtarynda, sondaı-aq aýdan ortalyqtary men 3 324 aýyldyq (halyq sany 250 adamnan astam) eldimekende qamtylǵan. Bul 16 mıllıonǵa jýyq adamdy ıaǵnı halyqtyń 90 paıyzyn keń jolaqty ınternetpen qamtýǵa múmkindik berdi.

Internetpen qamtamasyz etýde aýyldyq eldi mekenderde qıyndyqtar bar ekenin eskere otyryp, osylardy eńserý maqsatynda eki joba iske asyrylýda dep atap ótti. 

Birinshi joba – talshyqty-optıkalyq baılanys tehnologıasy boıynsha eldi mekenderdi keń jolaqty ınternetke qosý. Joba memlekettik-jekeshelik áriptestik tetigi arqyly júzege asyrylýda. Úsh jylda salynǵan talshyqty-optıkalyq jeli 20 myń shaqyrymnan asady.

2019 jyly ınternetke 494 aýyldyq eldi mekende ornalasqan 1 470 memlekettik organ men bújettik uıym qosyldy. 2020 jyly 769 aýyldaǵy memorgandar men búdjettik uıymdardy qamtý josparlanyp otyr.

Ekinshi jobada tórtinshi býyndaǵy uıaly baılanys jelilerin salyp, aýyldarda basqa da tehnologıalardy engizý qarastyrylýda. Bul joba 2020-2022 jyldar aralyǵynda iske asyrylady. Osy jobanyń nátıjesinde 880 aýyldyq eldi meken qamtamasyz etiledi. Osy arqyly halyqtyń 93 paıyzy ınternetpen qamtylady.

"2022 jyldyń sońyna qaraı keń jolaqty ınternetpen 5 myńǵa jýyq aýyldy eldi meken qamtylady. Nátıjesinde, biz 18 mıllıonǵa jýyq adamǵa nemese halyqtyń 97 paıyzyna ınternet qoljetimdi bolady. Qalǵan úsh paıyzy spýtnıktik baılanysty paıdalanýdyń tehnıkalyq múmkindigimen qamtamasyz etiledi", – dedi departament basshysy.