Japon azamattary mingen alǵashqy ushaq Tokıoǵa kelip jetti, – dep habarlaıdy Qamshy.kz RIA Novostı-ge silteme jasap.

Ushaqtaǵy dárigerler dene temperatýrasyn tekseretin qurylǵylarmen jabdyqtalǵan. Aýrý belgileri bar-joǵyna qaramastan, arnaıy avtobýstardaǵy barlyq jolaýshylar taldaý jasaý úshin aýrýhanaǵa jiberildi. Tokıodaǵy Haneda áýejaıyna kelgen eki jolaýshy bul jaǵdaıǵa narazylyqtaryn bildirdi.

Aýstralıa premer-mınıstri Skott Morrıson Qytaıdyń Ýhan qalasynda bolǵan aýstralıalyqtar Rojdestvo aralyna jiberilip jatyr, olarǵa karantın jarıalanady, – dep habarlaıdy jergilikti 9News telearnasy.

– Biz sol jerde bolǵan aýstralıalyqtarmen jumys jasaımyz jáne oqshaýlanǵan adamdardyń jeke basyn anyqtaý prosesin júrgizýge tıispiz. Meniń basty mindetim –  aýstralıalyqtardyń qaýipsizdigi, – dedi premer-mınıstr.

Onyń sózinshe, Ýhannan kelgen aýstralıalyqtardyń aralda jańa koronavırýsty juqtyrmaǵany anyqtalǵanǵa deıin eki apta ketedi.

Aýstralıadaǵy eń iri Qantas Airways áýekompanıasy Ýhannan azamattardy evakýasıalaýǵa óz kómegin usynǵan.

2019 jylǵy 31 jeltoqsanda Qytaı bıligi Dúnıejúzilik densaýlyq saqtaý uıymyna eldiń ortalyq bóliginde ornalasqan Ýhan qalasynda belgisiz pnevmonıanyń órshýi týraly habarlady. Mamandar aýrýdyń qozdyrǵyshyn anyqtady, bul –  2019-nCoV koronavırýsy.

QHR memlekettik densaýlyq saqtaý komıtetiniń sońǵy málimetterine sáıkes, Qytaıda koronavırýstyń jańa túrinen týyndaǵan pnevmonıamen aýyratyn adamdardyń jalpy sany 5974 adamǵa jetse, olardyń 132-i qaıtys boldy.

Qurlyqtan tys jerlerde Gonkong, Makao, Taıvan, Taıland, Japonıa, Ońtústik Koreıa, AQSH, Kanada, Vetnam, Sıngapýr, Nepal, Fransıa, Avstralıa, Malaızıa jáne Germanıada ınfeksıa juqtyrǵandar tirkeldi.