Osyǵan deıin qyzýy kóterilip kúdik týǵyzǵan 17 jastaǵy qyzda koronavırýs belgileri joq  ekeni anyqtaldy. Alaıda   dárigerler  emdelýshiden vırýstyń basqa túrin baıqaǵan, – dep habarlaıdy Qamshy.kz aqparat agenttigi Sputnik Qazaqstan saıtyna silteme jasaı otyryp.

Qazaqstannyń bas sanıtarlyq dárigeri Jandarbek Bekshınniń sózine qaraǵanda, jas qyzdyń aǵzasynan Gonkong tumaýy tabylǵan. Naýqas Qytaıdyń Pekın qalasynan kelgen.

Bul týraly Jandarbek Bekshın jýrnalıserge bergen suhbatynda dálme-dál:

«Ol qyzda H3N2 shtamy bar tumaý anyqtady. Bul – naqty derek», – degen bolatyn.

Naqty derekti aıtpaqshy, mıkrobıologıalyq klassıfıkasıa boıynsha Gonkong tumaýy H3N2 túrinde belgilengen. Ol álem boıynsha qaýipti vırýstar sanatyna jatady. Áýelde vırýs qustar arasynda taraǵanymen, keıinnen adamdarǵa da juǵa bastaıdy.

Aıta keteıik, 28 qańtarda Qazaqstanǵa Qytaıdan tórt adam ushyp keldi. Barlyǵyn birden ótkir respıratorlyq vırýsty ınfeksıa bar degen kúdikpen aýrýhanaǵa jatqyzdy. Olardyń ishinde joǵaryda atalǵan 17 jastaǵy qyz da bolǵan.