Dúnıejúzilik densaýlyq saqtaý uıymy koronavırýsqa baılanysty halyqaralyq deńgeıde tótenshe jaǵdaı dep tanydy. Bul týraly DDSU-nyń bas dırektory Tedros Gebreıesýs málimdedi. Degenmen uıym basshysy óz málimdemesinde halyqaralyq is-saparlar men saýdaǵa shekteý qoıýǵa negiz joq ekenin aıtty.

DDSU málimetteri boıynsha, Qytaıdyń ózinde vırýsty juqtyrǵandar sany on myńǵa jýyqtap, keminde 213 adam ólgen. 12 myńnan astam adamnan koronavırýs belgilerin izdep jatyr. Al Qytaıdan tys aýmaqta vırýsty juqtyrǵandar sany 100-ge jetti. 18 elden vırýs tabylǵan.

Mamandardyń aıtýynsha, vırýstyń adamdar arasynda juǵýynyń segiz faktisi bar.

Uıym sonymen qatar vırýsqa ýaqytsha "2019-nCoV" ataýyn berýdi usyndy.

Tedros Adhan Gebreıesýs bul vırýsty jeńýge bolatynyn eskertti. Sarapshylardyń pikirinshe, álem aýrýǵa qarsy turýdy jáne juqtyrǵan adamdy oqshaýlaýdy úırenýi kerek. Sonda ǵana aýrýdyń órshýi basylady.

Qytaı bıligine vırýs belgilerin anyqtaýǵa jáne naýqastardy saýyqtyrý úshin vırýstyń kózin tabýǵa, halyqaralyq áýejaılar men porttardy tekserýden ótkizýge keńes berildi.

Jeltoqsannyń aıaǵynda Qytaıdyń Ýhan qalasynda belgisiz pnevmonıanyń órshýi tirkelgen. Mamandar aýrýdyń qozdyrǵyshy - koronavırýstyń jańa túri "2019-nCoV" dep topshylady.