Parlament Senatynyń tóraǵasy Darıǵa Nazarbaeva ınklúzıvti bilim berý deńgeıiniń tómendigi men damýynda erekshelikteri bar balalarǵa arnalǵan ınfraqurylymnyń joqtyǵy týraly másele kóterdi. Bul týraly QazAqparat  habarlaıdy.

Múgedektigi bar adamdar quqyqtaryn qamtamasyz etý jáne ómir súrý sapasyn jaqsartý boıynsha usynystar ázirleý jónindegi jumys toby jumysynyń nátıjesi týraly aqparat kún tártibindegi birinshi másele boldy. Otyrys barysynda Áleýmettik-mádenı damý jáne ǵylym komıtetiniń tóraǵasy Murat Baqtıaruly múgedektigi bar adamdar quqyqtaryn qamtamasyz etý jáne ómir súrý sapasyn jaqsartý jóninde 62 usynys ázirlengenin atap ótti.

«Barlyq usynystardyń 42-si zańnamalyq aktilerge, 20-sy zańnan keıingi aktilerge ózgerister men tolyqtyrýlar engizý týraly boldy», - dedi M.Baqtıaruly.

Senat Tóraǵasy óz kezeginde jınalǵan usynystardy barshaǵa ortaq talqylaý úshin aqparattyq resýrstarda jarıalaý qajettigin atap ótti.

«Zańdardy, normatıvterdi, ádistemelerdi jaqsartý jáne osy qujattardy jumys istetý, jaýapkershilikti kúsheıtý úshin barlyq múmkindikti jasaý – Siz ben bizdiń mindetimiz. Bul asa mańyzdy ári aýqymdy jumysqa eń sońynda búkil qoǵamdy tartý kerek. Sebebi bul tek memleket pen áleýmettik qyzmetterdiń ǵana mindeti emes. Kóp nárse árkimniń kózqarasyna baılanysty ári bárimiz de adambyz», - dedi Darıǵa Nazarbaeva.

Senat Tóraǵasy ınklúzıvti bilim berý deńgeıiniń tómendigin, damýynda erekshelikteri bar balalarǵa arnalǵan qajetti ınfraqurylymnyń joqtyǵyn da atap ótti.

«Qalalyq kólik te solardyń qatarynda. Biz búdjet qarjysyn qalalyq kólik satyp alýǵa jumsaıtyn bolsaq, onda múmkindigi shekteýli adamdar da osy kólikti paıdalana alatyndaı tıisti tehnıkanyń bolǵany mindetti bolýy tıis. Bul temirjol kóligi men áýe qatynasyna da qatysty», - dedi Palata basshysy.

Búro músheleri Senattyń 6 aqpanda ótetin kezekti otyrysynyń kún tártibi boıynsha usynystardy da qarady. Otyrysta Salyq kelisimderine qatysty sharalardy oryndaý jónindegi kópjaqty konvensıany, SHYU-nyń ekstremızmge qarsy is-qımyl jónindegi konvensıasyn, tunshyqtyrǵysh, ýly nemese basqa da uqsas gazdar men bakterıologıalyq quraldardy soǵysta qoldanýǵa tyıym salý týraly hattamany ratıfıkasıalaý týraly zań jobalaryn qaraý josparlanýda.

Senatorlar Parlament Májilisinde maquldanǵan zań jobalaryn bólip berdi. Senattyń Ekonomıkalyq saıasat, ınovasıalyq damý jáne kásipkerlik komıteti «Dúnıejúzilik poshta odaǵynyń Jarǵysyna Toǵyzynshy qosymsha hattamany ratıfıkasıalaý týraly» zań jobasy boıynsha qorytyndyny odan ári pysyqtaý jáne daıyndaý jónindegi bas komıtet bolyp belgilendi.

«Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy zańsyz kóshi-qonǵa qarsy kúrestegi yntymaqtastyq týraly kelisimdi bekitý týraly» zań jobasy boıynsha Senattyń basqa komıtetteriniń usynystaryn qorytý jáne qorytyndy ázirleý Halyqaralyq qatynastar, qorǵanys jáne qaýipsizdik komıtetine tapsyryldy.

Sonymen qatar, búro otyrysynda parlamenttik tyńdaýlarǵa ázirlik jáne ótkizý týraly másele qaraldy.

28 aqpanda «Agroónerkásiptik keshendi damytý máseleleri» taqyryby boıynsha tyńdaý ótkizý josparlandy, al naýryz aıynyń basynda «Qazaqstannyń jeńil ónerkásibi: ónimdiligi joǵary bıznestiń qazirgi jaǵdaıy men damý bolashaǵy» jáne «Qazaqstannyń tranzıttik áleýetin damytý» atty tyńdaýlar ótedi.