Búgin «Nur Otan» partıasy men Qazaqstan Respýblıkasynyń Kásipodaqtar federasıasy arasyndaǵy ózara yntymaqtastyq týraly memorandýmǵa qol qoıyldy. Atalǵan qujatqa qol qoıýdaǵy basty maqsat – elimizdi áleýmettik-ekonomıkalyq jańǵyrtýǵa, qyzmetkerlerdiń áleýmettik-ekonomıkalyq jáne eńbek quqyqtary men múddelerin qorǵaý júıesin damytýǵa baǵyttalǵan birlesken is-qımyldardy júzege asyrý. Taraptar osy baǵyttaǵy júıeli ózara is-qımyl men syndarly yntymaqtastyqty qamtamasyz etý úshin ekijaqty kelisimge keldi.

Jıynda «Nur Otan» partıasy Tóraǵasynyń Birinshi orynbasary Baýyrjan Baıbek eki uıymnyń áleýmet qamyn jep, jurtshylyq múddesin kózdeýde maqsattarynyń toǵysatyn tustary kóp ekenin alǵa tartty.

«Memleket basshysy Qasym-Jomart Toqaev byltyr tuńǵysh ret kásibı mereke retinde engizilgen Kásipodaqtar kúninde «Qazirgi kásipodaqtardyń qozǵalystary eńbekkerlerdiń jumys ornyndaǵy quqyqtary men eńbek qaýipsizdiginiń saqtalýyn, laıyqty eńbekaqy men áleýmettik kepildikter alýyn qamtamasyz etedi», – dep atap ótken bolatyn. Osy rette, «Nur Otan» partıasy árqashan qazaqstandyqtardyń eńbek quqyqtaryn qorǵaýǵa erekshe kóńil bólýde. 2019 jyldyń qorytyndysy boıynsha  partıaǵa 217 myńnan asa aryz-shaǵym túsken, onyń 3 myńnan astamy eńbek zańnamasy, jalaqynyń ýaqytyly tólenbeýi, zańsyz jumystan shyǵarý máselelerine qatysty. Iaǵnı, qyzmetkerlerdiń eńbek quqyqtary boıynsha máseleler bizdiń el úshin óte ózekti.

Elbasy – «Nur Otan» partıasynyń Tóraǵasy Nursultan Nazarbaev «partıa qarapaıym adamdardyń muǵalimderdiń, dárigerlerdiń, ónerkásiptik kásiporyn eńbekkerleriniń múddelerin qorǵaýy qajet» dep atap ótken bolatyn. Osy baǵytta zańnyń ústemdigin, jumysshylardyń quqyqtary men bostandyqtaryn qamtamasyz etý boıynsha jumystardy jalǵastyrý úshin «Nur Otan» partıasy elimizdiń eń iri kásipodaqtar uıymy – Kásipodaqtar federasıasymen ózara yntymaqtastyqty odan ári damytýǵa kelisti» – dedi partıa Tóraǵasynyń Birinshi orynbasary.

Búginde elimizde jumys isteıtin adamdar sany 9 mıllıonnan assa, olardyń 2 mıllıony Qazaqstan Kásipodaqtary Federasıasynyń qatarynda. Al 600 myńnan astamy «Nur Otan» partıasynyń músheleri. Sondyqtan jumys isteıtin azamattardyń ózekti máselelerin sheshý, olardyń quqyqtary men múddelerin qorǵaý – partıa men kásipodaqtar qyzmetindegi basym baǵyttardyń biri.

Óz kezeginde Qazaqstan Kásipodaqtar federasıasynyń tóraǵasy Eraly Toǵjanov ekijaqty memorandýmǵa qol qoıýǵa kelisim bergen partıa basshylyǵyna alǵysyn bildirdi.

«Nur Otan» – naqty isterdiń partıasy. Halyqtyń janashyry, áleýmettiń jarshysy bolyp otyrǵan eń iri, bedeldi partıamen osyndaı qujatqa qol qoıýǵa kelip otyrmyz. Ózderińiz bilesizder, 2012 jyldyń ózinde Elbasy Nursultan Nazarbaev eńbek adamyna baılanysty úlken máselelerdi kótergen bolatyn. Sol suraqtardyń barlyǵy búgin de kún tártibinde tur. Sondyqtan eńbek adamynyń mártebesin, bedelin kóterýge tıistimiz. Partıamen kóptegen suraqtarymyz ortaq. Pedagog mártebesine baılanysty kóptegen suraq talqylandy. Biz engizgen usynystardyń naqty 14-i qabyldandy. Sol suraqtardyń ishinde qanshama sheshimin tapqan máseleler osy jerde «Nur Otan» partıasy aıasynda ótken otyrystan keıin jandandy dep aıtsam artyq emes» – dedi Eraly Toǵjanov.

Aıta keteıik, «Nur Otan» partıasy Tóraǵasynyń Birinshi orynbasary Baýyrjan Baıbek jýyrda Atyraý oblysyna jasaǵan jumys sapary barysynda, Maqat aýdanynyń Dossor kentinde «Dossormunaıgaz» kásiporyn qyzmetkerlerimen kezdesken edi. Onda munaı salasy jumysshylarynyń jalaqy máselesi men jergilikti turǵyndardy jumyspen qamtý jaıy da sóz boldy. Sondaı-aq jergilikti dárigerlermen júzdesý kezinde olardyń mártebesi men quqyqtyq turǵydan qorǵalý máseleleri qozǵaldy. Qazirgi tańda partıa basqa da salalardaǵy qyzmetkerlerdiń quqyqtaryn qorǵaýǵa múddeli.

Osy oraıda, jumyspen qamtý baǵyty boıynsha partıalyq kýrator alańynda osy saladaǵy kóptegen máselelerdi kóterip, olardy sheshýge yqpal etý kózdelýde. Sonymen qatar, partıa jumysshylardyń eńbek quqyqtary men múddelerin kózdeý, ishki eńbek naryǵyn qorǵaý boıynsha partıalyq jáne qoǵamdyq baqylaýdy júzege asyrýǵa bel býyp otyr.

Kelesi bir baǵyt – partıanyń qoǵamdyq qabyldaýlary men kásipodaqtardyń «Tatýlasý ortalyqtary» arqyly jumyskerlerdiń naqty máselelerin sheshý. Aldaǵy jumystarǵa «Jas Otan» jastar qanatynyń jáne «Keleshek» kásipodaq jastar keńesiniń belsendileri de tartylatyn bolady.

Atalǵan jumysqa «Nur Otan» partıasynyń Májilistegi jáne barlyq deńgeıdegi máslıhattardaǵy fraksıalary jumyldyrylmaq. Qazirgi kezde kásipodaq uıymdarynyń oblystyq deńgeıdegi 10 ókili, aýdandyq jáne qalalyq deńgeıdegi 16 ókili «Nur Otan» partıasy atynan máslıhat depýtattary. Aldaǵy saılaýda óńirlerdegi máslıhattardaǵy kásipodaqtardyń ókildigi ulǵaıtylatyn bolady.

Klara Naqyp