Sybaılas jemqorlyqqa qarsy máseleler boıynsha túzetýlerdi tanystyrý barysynda májilis depýtaty Vladıslav Kosarev sybaılas jemqorlyqqa qarsy qyzmet basshysynyń birinshi orynbasary Oljas Bektenovke zańdardy qataıtýdy usyndy. Sondaı-aq depýtat Qazaqstandaǵy sybaılas jemqorlyqqa qarsy kúresýdiń joldaryn atap aıtty. Bul týraly Tengrinews habarlaıdy.

– Biz sybaılas jemqorlyqqa qarsy zańnamalyq qujattardy birinshi ret qabyldap otyrǵan joqpyz. Meniń oıymsha, eger de korrýpsıamen kúresetin organdar kimniń kimge syılyq bergenin jáne kimge qonaqqa barǵanyn qadaǵalap otyratyn bolsa, ondaı organdar ózderin joǵaltady. Nelikten bılik shetelge eksporttalǵan úlken kólemdegi qarajat týraly parlamenttik suraqtarǵa jaýap bermeıdi? Sońǵy otyrysta parlamenttik jıynda suraqqa eshkim jaýap bere almady jáne eshkim shyǵyp taldamady. Bul sybaılas jemqorlyqpen kúres emes, kerisinshe kózboıaýshylyq. Meniń oıymsha, qazir jemqorlyqpen kúresetin ýaqyt keldi. Sonymen qatar, biz túzetip jatqanda zańnamalardy qatań talappen bekitý qajet", – dep pikir bildirdi Kosarev.

Osy tusta Oljas Bektenov Kosarevtiń pikirimen kelispeıtinin atap ótti. 

– Sybaılas jemqorlyqpen, onyń ishinde agenttikpen kúres júrgizilmeıdi degen tujyrymmen kelispeımin. Eger statısıkaǵa júginetin bolsaq, onda bizde jyl saıyn 2 myńnan astam sybaılas jemqorlyq qylmystary anyqtalady. Onyń ishinde iri para alý men urlyqtar. Bul buqaralyq aqparat quraldarynda belsendi túrde jarıalanýda. Jyl saıyn 1200-den astam adam sybaılas jemqorlyq úshin jaýapqa tartylady, sondyqtan jemqorlyqpen kúres qatań jalǵasýda jáne osy baǵytta aldyn alý jumystary júrgizilýde, – dedi Bektenov.