QR İshki ister mınıstriniń orynbasary Alekseı Kalaıchıdı Qordaıdaǵy oqıǵa boıynsha 10 adamnyń kóz jumǵanyn aıtty, dep habarlaıdy QazAqparat.

– 10 adam kóz jumdy. 39 adam aýrýhanada jatyr. Sonymen birege zardap shekkenderdiń ishinde bes polıseı bar. Úsheýi qarýdan jaralanǵan. Alaıda polısıa qyzmetkerleri eshqandaı qarýdyń qoldanbaǵanyn aıtqym keledi, – dedi Alekseı Kalaıchıdı OKQ-da ótken baspasóz máslıhatynda.

Sondaı-aq Alekseı Kalaıchıdı Qordaıdaǵy oqıǵanyń neden bastalǵanyn aıtyp berdi.

– Áý basta, ıaǵnı 5 aqpanda eki aýyldyń turǵyndary ustasyp qalǵan. Turmystyq qaqtyǵysqa qatysqandardyń biri qazir ustalyp, qalǵandary aýdannan shyqpaıtyny jóninde qolhatpen bosatyldy, – dedi Alekseı Kalaıchıdı.

Onyń aıtýynsha, aýyr júk kóligi úıden shyǵyp kele jatqan kezde jolda kele jatqan avtokólikpen jolǵa talasyp qalǵan.

– Kólikterde úsh-úsh adamnan bolǵan. Aqyry ózara janjal sońy tóbeleske ulasyp ketken, – dedi ol.

İİM basshysynyń orynbasary jol ústindegi tóbeleste alty kisiniń ishinde, shynynda da, jasy úlken kisiniń bolǵanyn rastady.

– Ol tóbeles kezinde zardap shekken... Jalpy qazir biz barlyq taraǵan aqparatqa taldaý júrgizip otyrmyz. Ol jerde júzge tarta adam bolǵan. Olardyń árqaısysynyń sol jerge kelý motıvin zerttep jatyrmyz, – dedi ol.