QR İshki ister mınıstriniń orynbasary Iýrıı Ilın kóktemgi sý tasqyny jaǵdaıyna daıyndyq týraly baıandady, dep habarlaıdy QazAqparat.

Onyń aıtýynsha, eldi mekenderdi sý tasqynynan qorǵaý úshin «2017-2020 jyldarǵa arnalǵan sý tasqyny qaýip-qateriniń aldyn alý jáne olardy joıý boıynsha sharalar kesheni» jol kartasy júzege asyrylýda.

– Jol kartasynda 521 is-sharany oryndaý kózdelgen. Bul baǵdarlamany qarjylandyrýǵa respýblıkalyq jáne jergilikti búdjetten 70 mlrd teńge qarastyrylǵan. Úsh jylda jol kartasynyń tapsyrmalaryn iske asyrý 1046 eldi mekenniń 724-indegi qaýip-qaterdi azaıtýǵa múmkindik berdi. Bul jumys áli aıaqtalmady, bıyl jalǵastyryp, baǵdarlamany tolyǵymen oryndaımyz, – dedi Iý. Ilın QR Parlamenti Májilisinde Ekologıa máseleleri jáne tabıǵat paıdalaný komıtetiniń otyrysynda.

Jol kartasyna sáıkes, 2019 jyly Aqtóbe, Atyraý, SHQO, Jambyl, BQO, Mańǵystaý, Pavlodar, Túrkistan, Qostanaı oblystarynda 36 shara jasalǵan.

– Bul aımaqtardaǵy eldi mekenderdi sý basý qaýpi týýy múmkin. Jol kartasynda kórsetilgen sharalardyń oryndalmaý sebebi – qarajattyń jetpeýi, jobalyq-smetalyq qujattamanyń bolmaýy jáne Jol kartasynyń kesh oryndalýy. Qazir jergilikti atqarýshy organdardyń basty mindeti – eldi mekenderdi qardan tazartý, – dedi mınıstrdiń orynbasary.

Ásirese, Nur-Sultan qalasy men oǵan irgeles Aqmola, Pavlodar, Qostanaı oblystaryna qar kóp jaýǵan.

– Ońtústik Qazaqstandaǵy Syrdarıa sý qoımasynda qaýip joq. Ondaǵy sý 3,6-3,9 mlrd tekshe metrge jetedi. Syrdarıadaǵy muz qalyńdyǵy ótken jylmen salystyrǵanda tómen, sondyqtan sý kóbeıgende qabyrshaq muz kóbeıip, kedergi keledi dep oılamaımyz. Ózen alqabynan asyp ketpeıdi. Jambyl oblysynda da esh qaýip joq, – dedi Iýrıı Ilın.

Almaty oblysy boıynsha kóktemde qar erip, jańbyr jaýǵanda sý tasqyny qaýpi týyndaýy múmkin.

– SHQO boıynsha keıbir taýly aımaqtardaǵy qardyń jamylǵysy 25% kóbirek. Qoldaǵy qorymyz erkin jumys isteýge múmkindik beredi. Ótken jyly Semeı qalasynda tótenshe jaǵdaı boldy, sý qoımasynda keptelis bolyp, muz qatty, sáıkesinshe Ertis ózeniniń tasýyna ákep soqty, – dedi ol.

İshki ister mınıstrligi sý tasqyny bolǵan jaǵdaıda, eń aldymen Ortalyq Qazaqstan aýmaǵy baqylanatynyn aıtady. Iýrıı Ilınniń aıtýynsha, qardyń kóptiginen Vácheslav sý qoımasy tez tolýy múmkin. Sondyqtan qazir aldyn-ala sýdy aǵyzý týraly sheshim qabyldanbaq.

– Jaýyn-shashyn kóp jaýǵan Aqmola oblysynyń tómengi bóliginde qıyndyq týyndaýy múmkin. Ol jaqta qajetti sharalar qabyldandy, 500-den astam úı esepke alyndy. Qazir ákimdik jańa baǵdarlama ázirlep jatyr, onda qaýipti aýdandarda qalǵan turǵyndardy jańa turǵyn úılerge kóshirý úshin qarajat bólinedi. Sodan keıin biz Atbasardaǵy qaýip-qater rejımin alyp tastaımyz, – dedi Iýrıı Ilın.

Sonymen birge, Soltústik Qazaqstandaǵy Sergeevka sý qoımasyndaǵy jaǵdaı qalypty. Onda halyqty sý basý qaýpi joq.