Kúni keshe Bas prokýratýra arandatýǵa baılanysty qazaqstandyqtarǵa úndeý jasady. Vedomstvo áleýmettik jeliler men messendjerlerde quqyqqa qaıshy áreketterge shaqyratyn habarlamalardyń jıilep bara jatqanyn aıtty. Osyǵan baılanysty prokýratýra arandatýǵa ermeýge shaqyrdy. Bul týraly tengrinews.kz habarlady.  

Depýtattar biraýyzdan halyqty birlikke shaqyryp, qandaı jaǵdaı bolsyn tártipke baǵyný keregin aıtady.

Depýtat Baqytgúl Hamenova taıaýda Májiliste arandatýshylarǵa qatysty Ákimshilik, Qylmystyq kodekstiń jańartylyp, oǵan ózgertýler men tolyqtyrýlar engizilgenin aıtyp ótti. Taıaýda ol erejeler qoldanysqa enedi deıdi.

– Sońǵy kezderi arandatý jaǵdaılary jıilep bara jatyr. Mysaly, arandatýdyń qurbany bolǵan elder jetedi – Sırıa, Lıvıa, Iran, Irak, Aýǵanstan, Ýkraına. Munyń barlyǵy saıyp kelgende ózi az halyqty tarydaı shashyp jiberý degen sóz. Ol zulym kúshterdiń qolynan ǵana keledi. Árıne, biz zańdy kúsheıtip, jazany qatańdatyp jatyrmyz. Degenmen el bolǵan soń bes saýsaq birdeı emes. Meniń basty ustanymym – ıdeologıa myqty bolýy kerek , – deıdi Hamenova.

Onyń aıtýynsha, arandatýshyny halyqqa kórsetý kerek. 

– Bul jerde másele qorqytýda emes, kerisinshe, ıdeologıaǵa, sana-sezimge silkinis jasaý kerek. Qazir zańdaǵy arandatýshylarǵa qatysty jaza jetkilikti dep oılaımyn. Alaıda halyq aldyna shyǵarý qajet. Jazany sanaly adam ózi kóterýi qajet, – deıdi ol.

Al depýtat Baqytbek Smaǵul demokratıa dep, tártipke baǵynbaı arandatqandardyń barlyǵyn baqylap, jazalaý múmkin emes ekenin aıtady.

– Qazir qoǵamnyń ózi solaı. Kim ne aıtqysy kelse, sony aıtady. Bılikke senimsizdik tanytyp, ózinshe úkim shyǵarý durys emes. Demokratıa demeı, tártipke baǵyný kerek. Árqaısymyz kishkene bolsa da ózimizdiń jaýapty ekenimizdi kórsete bilýimiz qajet. (...) Árıne, oılardy bólisý kerek. Biraq ol oılar halyqtyń yntymaǵyn, birligin buzbaýy qajet. Bir top bolyp pıǵyl oılardy jetkizý jaqsylyqqa aparady dep oılamaımyn. Bul kerisinshe, shalynýǵa aparatyn sıaqty, – deıdi Baqytbek Smaǵul.

Depýtat Darhan Myńbaı bolsa, kópke topyraq shashýǵa bolmaıtynyn aıta otyryp, aqparat qabyldaıtyn árbir adamnyń sanasy bolýy keregin aıtady.

– Árıne, sana-sezimniń oıanǵany jaqsy, biraq ol stıhıaly túrde bolmaýy kerek. Ol órkenıetti túrde quqyq sheńberinde bolýy kerek, kópke topyraq shashýǵa bolmaıdy aqparattyń kóptigi sonshalyq – árbir adam ony súzgiden ótkizýi qajet, – deıdi Darhan Myńbaı.

Onyń aıtýynsha, arandatýshylarmen kúresý úshin bastapqyda halyqtyń sanasymen jumys isteý qajet.

– Bul jerde barlyǵy ár adamnyń bilimine, mádenıetine baılanysty dep oılaımyn. Halyqtyń sanasyna jetkizý kerek, zańda belgilengen jaza bar. Bir ret jazalanǵan adam ekinshi ret ol jazaǵa ushyramaý aıaǵyn ańdap basyp, aýzyna berik bolatyn shyǵar dep oılaımyz, – deıdi depýtat Darhan Myńbaı.

Al zańger Danıar Túımebaev Qazaqstanda arandatýshylardyń jazasy álsizdeý ekenin aıtady. Onyń aıtýynsha, áleýmettik jelide kórineý aqparat taratyp, halyqty tártipsizdikke shaqyratyndarǵa arnaıy bap qaralýy qajet.

– Búginde, sońǵy zańnama boıynsha Qazaqstannyń ýnıtarlyǵy men tutastyǵyn buzýǵa shaqyrǵandar 5 jylǵa, terorızmdi nasıhattap, terakt jasaýǵa shaqyrǵandar 2 jyldan 9 jylǵa deıin, áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrǵandar 8 jylǵa deıin sottalady. Al bolashaqta BAQ nemese áleýmettik jeli arqyly jalǵan málimet taratqan adamǵa 500 AEK (1 325 500 teńge) kóleminde aıyppul salý josparlanyp otyr, – deıdi ol.