2019 jyldyń qyrkúıek aıynda Pavlodardaǵy iri qoımalardyń birinde máıiti tabylǵan polıseı Rýslan Ospanovtyń isi zań júzinde toqtatyldy.

Óler aldynda áldekimniń esimin ataǵan polıseıdiń óz-ózine qol jumsaýyna bireýdiń qatysy bar degen aıǵaq anyqtalmady. 

 – Bul iske qosymsha bir taraptyń qatysy bolmaǵan soń, óz-ózine qol jumsady degen derekpen tirkelgen qylmystyq is boıynsha isti toqtatý týraly sheshim qabyldandy. Sonymen qatar ózge de aqparattardy zań boıynsha jarıalaýǵa bolmaıdy, – dep jaýap berdi Pavlodar oblysynyń sybaılas jemqorlyqqa qarsy qyzmet departamenti basshysynyń orynbasary Darhan Quraqbaev. 

Búginge deıin bul is "óz-ózine qol jumsaýǵa deıin jetkizý" baby boıynsha zerttelgen. Polısıanyń qylmystyq isimen jergilikti ishki ister departamenti aınalysqan bolatyn. Keıin qaza tapqan adamnyń týystary áleýmettik jelide bolǵan oqıǵaǵa polısıa departamenti basshylarynyń biriniń qatysy bar degen kúdikti jetkizgen. Sodan soń bul is sybaılas jemqorlyqqa qarsy qyzmet departamentine tapsyrylǵan. 

Osyǵan qatysy bar dep kúdikke ilingen polısıa departamentiniń tergeý jónindegi orynbasary Muratjan Shákirov qyzmetinen bosatylǵan. 

Eske salsaq, 2019 jyldyń qyrkúıek aıynda Pavlodar qalasynda ornalasqan turǵyn úı qoımasynyń birinen polısıa qyzmetkeri asylǵan kúıinde tabylǵan bolatyn.