Bul týraly Qamshy.kz aqparat agenttigi Qazaqparat dáıegine súıene otyryp habarlaıdy.

«QR Tuńǵysh Prezıdenti – Elbasy Nursultan Nazarbaev ekonomıkanyń dástúrli óndirýshi salalarynyń tıimdiligin arttyryp, Qazaqstandy geologıalyq barlaýdyń álemdik naryǵyna shyǵarý mindetin qoıdy. Munaı-gaz ben taý-ken metalýrgıasy salalaryn ornyqty shıkizat bazasymen qamtamasyz etý qajet. Qazirgi ken oryndary birtindep, sarqylýda. Sonymen birge, búgingi kúni Qazaqstan aýmaǵyn zertteý deńgeıi 25 paıyzdan sál ǵana asyp otyr. Osyǵan baılanysty Memleket basshysy Qasym-Jomart Toqaev Úkimetke geologıalyq barlaýdyń memlekettik baǵdarlamasyn ázirleýdi tapsyrdy», – dedi Asqar Mamın.

Premer-Mınıstrdiń aıtýynsha, bolashaq memlekettik baǵdarlamanyń tujyrymdamasy geologıalyq salany damytýǵa baǵyttalǵan. Iaǵnı, Geologıalyq barlaýdyń memlekettik baǵdarlamasyn tıimdi iske asyrý arqyly 1 teńge salyp, salaǵa 4 teńgege deıin qosymsha jeke ınvestısıa tartýǵa bolady.

"Elimizdiń, ásirese monoqalalardyń mańynda mıneraldyq shıkizat bazasyn molyqtyrý ekonomıkaǵa oń áserin tıgizip, ónerkásip salalaryn damytý úshin naqty negiz bolady. Munan basqa, jańa ken oryndaryn ashqan kezde jańa óndiristik keshender qurylady. Bul 6 trln teńgege deıin ınvestısıa tartyp, 20 myńǵa jýyq jumys oryndaryn ashýǵa múmkindik beredi», – dedi Premer-Mınıstr.

Sondaı-aq, Asqar Mamın geologıalyq barlaý jumystaryn júrgizgen kezde geofızıkalyq zertteý men jerdi qashyqtan zondtaýdyń jańa ádisterin qoldaný kerektigin aıta kelip, Ekologıa, geologıa jáne tabıǵı resýrstar mınıstrligine osy jyldyń 31 mamyryna deıin memlekettik baǵdarlama jobasyn Úkimetke engizýdi tapsyrdy.