Almaty qalasynyń ákimi Baqytjan Saǵyntaev qala turǵyndarymen ótken eseptik kezdesýde áýejaı mańyndaǵy jerlerdi qala menshigine qaıtarý jumystary týraly málimdeme jasady. Bul týraly ákimdiktiń baspasóz qyzmeti habarlady.

– Buǵan deıin "Kazkommersbank" kepilge bergen 383 gektar jer kúrdeli nesıeler qoryna berilgen edi. Endi bul jer qala ákimdigine qaıtarylady. Biz bul týraly elbasyna ótinish jazǵan bolatynbyz. Úkimet bizdi qoldady. Al jańa jylǵa deıin 383 gektar jer qaıtaryldy. Endigi 185 gektar jer qaldy. Bul áýejaı aýmaǵyna tıesili. Osy másele boıynsha qazir úkimetpen kelissóz júrgizip jatyrmyz,– dedi megapolıs ákimi.

Sonymen qatar qala ákimi Almaty áýejaıy mańyndaǵy jer ýchaskelerin zańsyz berý boıynsha sybaılas jemqorlyqqa qarsy qyzmettiń sotqa deıingi tergeý jumystaryn júrgizip jatqanyn aıtty.

– Talǵar aýdandyq ákimdiginiń laýazymdy tulǵalary 2015-2019 jyly qyzmettik ókilettiligin asyra paıdalanyp, áýejaıdyń sanıtarlyq qorǵaý aımaǵyndaǵy jeke qosalqy ýchaskeleri, sonyń ishinde turǵyn-úı salýǵa jer bergeni úshin zańsyz sheshimder qabyldaǵany anyqtaldy, –  dedi qala ákimi.