Demokratıalyq partıa qurǵysy kelip júrgen bastamashylar delegattardy jappaı tutqyndaǵannan keıin quryltaı seziniń ornyna mıtıń ótkizetin boldy. Bul týraly partıa bastamashyl tobynyń jetekshisi Janbolat Mamaı habarlady. 

– Bizdiń qoldaýshylarymyz ben belsendilerimizge quryltaı kongresin toqtatý úshin buryn-sońdy bolmaǵan qysymnyń saldarynan 22 aqpanda josparlanǵan sıez bolmaıtynyn habarlaımyz. Biraq sol kúni biz adam quqyǵyn buzýǵa qarsy narazylyq bildiretin mıtıńke kelip, búgin qamaýda otyrǵan jaqtastarymyzben birge ekenimizdi kórsetemiz , – dedi Janbolat Mamaı.

Janbolat Mamaıdyń aıtýynsha, sońǵy kúnderi Demokratıalyq partıanyń barlyq óńirdegi belsendileri men quryltaı sezine qatysqysy keletin delegattar zańsyz ustalǵan. 

– Keshe Mańǵystaý oblysynan sezge bara jatqan 30-ǵa jýyq adam ustalyp, oblystyq polısıa basqarmasyna jetkizildi. 5 adam bes kúnge qamaýǵa alyndy, búgin taǵy birneshe sot prosesi ótedi. Atyraý oblysyndaǵy belsendimiz Álibek Musauly da qamaýǵa alyndy. Qostanaı men Semeıdegi jaqtastarymyzǵa da qarsy qylmystyq ister qozǵalyp jatyr, – dedi Demokratıalyq partıa bastamashyl tobynyń jetekshisi.