Almaty qalasynyń ákimi Baqytjan Saǵyntaev «Woman in business» kásipkerlik forýmynda áıelderdi bıznespen aınalysýǵa shaqyrdy, dep habarlaıdy Qamshy.kz aqparat agenttigi QazAqparat deregin negizge alyp. 

"Ózderińiz bilesizder elimizde jınalatyn salyq túsiminiń 25%-y Almatydan túsedi. Shaǵyn jáne orta kásipkerliktiń 60%-y osynda. Sondyqtan SHOB (shaǵyn jáne orta bıznes - red.) sýbektilerin qoldaýǵa jumys jasaımyz. «ÁKK» AQ sheńberinde arnaıy qarjylyq uıymdar quryldy. Qarajat bóldik. Byltyr buǵan 1 mlrd teńge bólinse, bıyl 30 mlrd teńge bólinedi. SHOB sýbektilerine nesıe 2-7%-ben berilmek", - dedi ol.

Eń qyzyǵy, bul paıyzdyq ólshem Almaty qalasyn "joǵarǵy jaq" jáne "tómengi jaq" dep qaq bóledi. 

"Eger sizdiń kásibińiz tómengi Almaty jaqta bolsa, sizge paıyzdyq mólsherleme 2%, al joǵarǵy jaǵynda bolsa paıyzdyq mólsherleme 7 % bolmaq», - deıdi Baqytjan Saǵyntaev.

Shahar basshysy budan ári «Baqytty otbasy» baǵdarlamasy aıasynda «İsker ana» jobasy iske qosylǵanyn aıta kelip:

«Ár aýdanda belsendi áıelder bar. Solardyń múmkindigin ashý úshin biz osy baǵdarlamany qostyq. Olarǵa grant bólip, qural-jabdyq alyp berip jatyrmyz. 1 myńnan astam ana kómek aldy. Olardy oqytyp, zań turǵysynan kómek berip jatyrmyz», - dedi.

Osy rette, «Turǵyn úı qurylys jınaq banki» AQ basqarma tóraıymy Lázzat Ibragımova kásipker áıelderdi qurylys jáne ónerkásip salasyna shaqyrdy. Onyń aıtýynsha, qazir áıelderdiń kópshiligi bilim berý, densaýlyq saqtaý, saýda salasynda júr. Al memlekettik qoldaý kóbinese qurylys salasyna beriledi.

«Meniń oıymsha, áıelder qurylys salasyna da kerek. Áıelder tek bıznes basqarýshy ǵana emes, bıznes ıesi bolsa eken deımiz. Eń bastysy áıelde úsh nárse: bilim, jeke baspanasy, depozıtinde qarjysy bolsa boldy», - dedi Lázzat Ibragımova.

Dál osy tusta Baqytjan Saǵyntaev Lázzat Ibragımova aıtqan "úshtikti" tolyqtyryp: «Jáne jaqsy kúıeý kerek», - dep ázildedi ákim.