Qazaqfılm men rejıser Aqan Sataev bir-birimen «Tomırıs» fılmi úshin sottasyp jatyr. Kınostýdıa SATAI FILM kompanıasy memlekettik satyp alýlar týraly kelisimshartty buzyp, qarjylyq esepti tolyq tapsyrmady dep aıyptady. Al rejıser kelisimshartta qujattardyń naqty tizimi jasalmaǵanyn alǵa tartyp otyr, dep jazady azattyq-ruhy saıty.

Jaqynda buqaralyq aqparat quraldarynda «SATAIFILM» JSHS Qazaqfılm kınostýdıasynan «Tomırıs» fılmi úshin 9 mıllıonnan astam teńge tóleýin talap etip, sotqa bergeni týraly aqparat taraǵan edi. Olardyń daýyna kelisimshartta qujattardyń naqty tizimi jazylmaǵany sebep bolǵany da aıtylǵan.

Qazaqfılm men «SATAIFILM» JSHS kelisimshartty 2019 jyldyń 12 mamyrynda jasaǵan. Zań boıynsha kompanıa kelisimsharttaryn byltyrǵy jyldyń 31 jeltoqsanyna deıin oryndaýy kerek bolǵan. Degenmen, Esep komıteti júrgizgen memlekettik aýdıtten keıin arnaıy komısıa qurylyp, tehnıkalyq talaptardyń oryndalmaǵany anyqtaldy.

«Aqan Sataevtyń stýdıasy memlekettik satyp alý týraly kelisimdi oryndaý boıynsha qarjylyq esepti tolyq tapsyrmaǵan. Olar úsh kún ishinde bul olqylyqty joıýy kerek edi. Degenmen, SATAIFILM kompanıasy qosymsha qujattardy (shyǵyndardy dáleldeıtin kelisimshart, akt, shot-faktýra) tapsyrmady»  dedi Qazaqfılmniń baspasóz qyzmeti.

Olardyń habarlaýynsha, kınostýdıa da Aqan Sataevtyń kompanıasyn sotqa bergen.

– Belgili bir áreket algorıtmi bar jáne biz ony anyq ustanamyz. Rejıserdiń eńbegi, fılmniń sapasy, osy máselede alynǵan memlekettik qarjylandyrý mólsheri mańyzdy emes. Zańdy baqylaıtyn sharttyń merzimi men talaptary saqtalǵany mańyzdy. Reseı kınoındýstrıasynda osyndaı jaǵdaılardyń oryn alatynyn aıta ketken jón: belgili bir kompanıalar memleketten fılmder túsirýge aqsha alyp, keıin qajetti túrde esep bere almaıtyn jaǵdaılar oryn alady, bul sot talqylaýyna ákep soǵady, – dedi «Qazaqfılm» kınostýdıasynyń ekonomıka jáne josparlaý bóliminiń basshysy Vıktorıa Chernova.

Eske sala keteıik, rejıser Aqan Sataevtyń «Tomırıs» fılmi 27-qyrkúıekte prokatqa shyqqan bolatyn. Bizdiń zamanymyzǵa deıingi VI ǵasyrda bolǵan oqıǵany sýretteıtin fılmdi túsirýge QR Mádenıet jáne sport mınıstrligi tapsyrys bergen edi.