Búgin, 21 aqpanda Qazaqstan prezıdenti Qasym-Jomart Toqaev Nur-Sultandaǵy "Áziret-Sultan" meshitine baryp, Qazaqstan musylmandary dinı basqarmasynyń jańadan saılanǵan bas múftıi Naýryzbaı qajy Taǵanulymen kezdesti. Bul týraly Aqorda saıty habarlady. 

Aqordanyń jazýynsha, Toqaev bas múftıdi jańa laýazymymen quttyqtap, aldaǵy qyzmetine tabys tiledi. Prezıdent pen múftıdiń kezdesýinde eldegi tatýlyq pen turaqtylyqty saqtaý, din arqyly azamattardy kelisim men yntymaqqa shaqyrý, rýhanı baǵdar berý qajettiligi men jat dinı aǵymdardyń zıandy áreketteri jaıynda aıtyldy.

– Halyqty tatýlyqqa, birlikke, pátýaǵa shaqyrý kerek. Qazirgi ýaqytta dúnıe júzinde ártúrli jat úderister paıda bolyp jatyr. Sondyqtan buǵan tyıym salyp, jol bermeýge tıispiz. El múddesine qyzmet etip, osy baǵytta durys úgit-nasıhat jumystaryn júrgizý qajet, – dedi prezıdent.

Bas múftı prezıdentke Qazaqstan musylmandary dinı basqarmasynyń aldaǵy aqparattyq jáne uıymdastyrý jumystary men qaıyrymdylyq sharalarynyń josparyn tanystyrdy.