Densaýlyq saqtaý mınıstrliginiń resmı ókili Dıas Ahmetsháriptiń aıtýynsha, Qazaqstanda koronavırýs ınfeksıasymen aýyratyn naýqastar tirkelgen joq. Bul týraly ol OKQ-da ótken baspasóz máslıhatynda málimdedi. 

– Keıingi kezde áleýmettik jeliler men WhatsApp messendjerinde kóptegen qaýeset tarap júr. Bir óńirde nemese qalada osyndaı naýqas adamdy aýrýhanaǵa jatqyzypty degen aqparat kóp. Ondaı qaýesetke senbeńizder. Bizde táýligine 24 saǵat, aptasyna 7 kún Ortalyq jedel shtab qyzmet etedi. Sol sebepti úreı týǵyzbas úshin bizdiń baspasóz ortalyǵyna habarlasýǵa bolady, – dedi ol.

Sondaı-aq ol shyndyqqa janaspaıtyn aqparat taratqandar ákimshilik jaýapkershilikke tartylatynyn aıtty. Túsinispeýshilik týyndamas úshin ortalyq jedel shtab arqyly barlyq resmı aqparatty taratyp otyratynyn atap ótti. 

– Koronavırýs ınfeksıasyn juqtyrǵan naýqas bizde joq. Bas dárigerdiń qaýlysy boıynsha Qytaıda 6-20 aqpan aralyǵynda bolǵan azamattardyń barlyǵy karantınge jatqyzylady. Iaǵnı, aldyn alý sharalaryn kúsheıtip otyrmyz, – dedi Dıas Ahmetshárip.