Bul týraly Qamshy.kz aqparat agenttigi Azattyq Rýhy deregine súıenip habarlaıdy.
Aýyl ákimdigi tek 1 táýlikten keıin ǵana traktor jibergen. Al turǵyndar bul aralyqta qora-qopsyny aıtpaǵanda, baý-baqshanyń qunarly topyraǵy aǵyn sýmen ketkenin aıtady.
«Kól jasandy emes, tabıǵı kól. Arnasyna syımaǵan sýy jerdi tesip shyǵyp, aýylǵa qaraı aǵyp jatyr. Birneshe úıdi shaıyp úlgerdi. Ákimdikke habarladyq. Olar der kezinde kómektese almaı otyr. Ózimiz qum tasydyq. Ákim keldi, úılerińe kirmepti ǵoı dep ketip qaldy», - deıdi Jolaman aýylynyń turǵyny.
Belgili bolǵandaı, aýyl ákimi araǵa bir táýlik ótken soń ǵana jalǵyz tehnıka jiberipti. Onda da bir ǵana traktor kelip, arnany bitegen.
Osy rette, bul jaǵdaıǵa baılanysty aýdan ákimdigine habarlasqanbyz.
"Qajetti tehnıka aýdan ortalyǵynan erteńinde bardy. Biraq bul jerde tehnıkany qajet etetindeı apat oryn almaǵan. Kólshik tabıǵı bolǵanmen de, turǵyndar baý-baqshany sýarý maqsatynda jasandy aryq qylyp buryp alǵan eken. Sý deńgeıi kóterilgen kezde sol jerdi shaıyp ketken. Zardap shekkender joq jáne eshbir baspanaǵa zaqym kelmegen. Qazirgi ýaqytta apat oryn alǵan jer qalpyna keltirildi. jaǵdaı qalypty", - deıdi Kerbulaq aýdany ákiminiń baspasóz qyzmeti.
Al turǵyndar aýyl ákiminiń bul ýájimen kelispeıdi. Eldi-mekenniń qyr jelkesinde turǵan tabıǵı kólden qaýip áli tolyq seıilmegenin aıtady.
Atap óteıik, Jolaman aýylynda 2 myńǵa jýyq turǵyn bar. Aýyl jastarynyń kóbi qalaǵa ketkendikten, halyqtyń deni zeınetkerler.
Pikir qaldyrý