Qoǵam belsendisi Dýlat Aǵadildiń Nur-Sultan qalasyndaǵy tergeý ızolátorynda qaıtys bolýyna baılanysty ishki mınıstrliginiń aldyna jınalǵan elýge jýyq belsendini polısıa kúshpen tarata bastady. Olardy arnaıy avtobýsqa otyrǵyzýǵa kiristi. Olar Dýlat Aǵadildiń qazasy jaıly tolyq aqparat berýdi talap etken6, dep jazady Qamshy.kz aqparat agenttigi Azattyqtyń deregin negizge alyp. 

Jınalǵandar aldyna bastapqyda Nur-Sultan qalalyq polısıa departamentiniń bastyǵy Nurjan Sádenov shyǵyp, Dýlat Aǵadildiń qazasy jaıly qysqasha aqparat bergen. Ol osyǵan deıin taralǵan resmı aqparatty rastap, "tergeý ızolátorynda Dýlat Aǵadil janynda tórt adam otyrǵanyn, olardyń Dýlat Aǵadilge kúsh kórsetilmegenine kýálik bergenin, júrek talmasynan qaıtys bolǵanyn" aıtqan.

Shamamen bir saǵattan keıin polısıa kelip, jıyndy kúshpen taratýǵa kiristi.

Belsendilerdiń keıbiri Dýlat Aǵadildiń júrek talmasynan qaıtys bolǵanyna senbeıtinin bildirgen edi.

Belsendiler Dýlat Aǵadildi "ádiletsizdikke, Qazaqstandaǵy qazirgi saıası rejımge qarsy shyǵyp júrgen adam" dep sıpattady jáne "onyń 2019 jyly kóp balaly áıelder jıynyna baryp kómekteskenin" eske alǵan bolatyn. Belsendilerdi áketkennen keıin ishki ister mınıstrliginiń aldynda bir top kóp balaly áıelder qaldy. Olardy polısıa baqylap tur.

Nur-Sultan qalasynyń tóńiregindegi aýyldardyń birinde turatyn belsendi, alty balasy bar Dýlat Aǵadildiń tergeý ızolátorynda qaıtys bolǵany týraly aqparat búgin shyqqan.

Nur-Sultan qalalyq polısıa departamenti "Tergeý ızolátorynyń kamerasynda onan ózge tórt adam boldy, olar Dýlat Aǵadilge kúsh qoldanylmaǵany jaıly kýálik berdi. Medısınalyq kýálik onyń qamaýǵa alynǵan sátte alkogóldi ishimdik ishkenin, mas ekenin kórsetti. Jedel járdem brıgadasy keldi. Qaıtys bolýyna "júrek talmasy sebep bolǵan". Denesinde qandaı da bir jaraqattar joq. Sotqa deıingi tergeý jumystary bastaldy, - degen aqparat taratqan.

Polısıa departamenti baspasóz qyzmetiniń jazýynsha "bıyl qańtar aıynda Dýlat Aǵadilge aıyp taǵylyp, "eshqaıda ketpeý" týraly shara qoldanylǵan. Tergeýge kelmegenine baılanysty sot sheshimimen 24 aqpanda qamaýǵa alynǵan".

Dýlat Aǵadil – áleýmettik problemalar jáne azamattyq quqyqty saqtaý máselesin kóterip júrgen belsendi. Bıyl tamyz aıynan beri birneshe ákimshilik jazaǵa tartylyp, kem degende 60 táýlik qamaýda otyrǵan.

Ol 2019 jyldyń 16 jeltoqsanynda ruqsat etilmegen aksıaǵa qatysty dep aıyptalyp, 10 táýlikke qamalǵan edi. Qarashanyń ortasynda ákimshilik qamaýda otyrǵan Selınograd aýdandyq tergeý ızolátorynan qashyp shyǵyp, ol áreketin "zańsyz qýdalaýǵa qarsylyǵym" dep túsindirgen. Polısıa eki kún boıy izdegen belsendi 15 qarashada ózi bas prokýratýra aldyna kelgen. Keıin ol "sot qaýlysyn oryndamaǵany úshin" taǵy 6 táýlikke sottalǵan.