Saýd Arabıa koronavırýsqa baılanysty jeti memlekettiń azamattaryna elektrondy vıza berýdi ýaqytsha toqtatty. Bul tizimniń ishinde Qazaqstan da bar. Bul týraly Saýd Arabıanyń SPA aqparat agenttigi habarlady. 

"Koronavırýstyń taralýyn aldyn alý maqsatynda Qytaı, Japonıa, Sıngapýr, Malaızıa, Ońtústik Koreıa, Italıa jáne Qazaqstan azamattaryna elektrondy vıza berý ýaqytsha toqtatyldy. Sonymen qatar atalmysh el azamattary Saýd Arabıanyń áýejaılarynan týrısik vıza ala almaıdy" dep  jazylǵan SPA aqparat agenttigi taratqan habarlamada.

Qazaqstannyń koronavırýs indeti jaılaǵan elder qataryna qalaı kirgeni áli belgisiz. Búgingi kúnge deıin Qazaqstanda koronavırýs juqtyrǵandar tirkelmegen. 

Resmı derek boıynsha, Saýd Arabıasynda koronavırýs tabylmaǵan. Alaıda vırýs Taıaý Shyǵys elderinde, onyń ishinde Iranda jyldam tarap barady. Sońǵy derek boıynsha, munda COVID-19 vırýsynan 26 adam kóz jumǵan. 

27 aqpanda Saýd Arabıasy jyl saıyn álemniń túkpir-túkpirinen mıllıondaǵan adam qajylyq sapar jasaıtyn Mekke men Mádınaǵa ushatyn reısterdi toqtatqan bolatyn.