Áleýmettik jelide tergeý ızolátorynda qaıtys bolǵan elordalyq belsendi Dýlat Aǵadildiń máıiti túsirilgen vıdeo taraýda. Vıdeony túsirýshi marqumnyń denesinde birneshe jaraqat bolǵanyn aıtady.

Vıdeony túsirgen adam máıittiń 2 kúndik saraptamadan ótkenin aıtady. Beınejazbadan marqumnyń tabanynda, arqasynda jaraqat baryn, ıyǵynyń kógerip, saýsaǵynyń qaraıyp ketkenin baıqaýǵa bolady. 

Osyǵan deıin İshki ister mınıstriniń orynbasary Arystanǵalı Zapparov Dýlat Aǵadil polısıa qyzmetkerleri úıinen alyp ketken kezde mas bolǵanyn aıtqan. 

– Tańǵy saǵat 6-da tamaǵyn ishken. 7-de dárethanaǵa ketedi. Odan shyǵysymen tizerlep otyryp, esinen tanyp qulap qalǵan. Kameradaǵylar Aǵadildiń densaýlyǵynyń nasharlaǵany týraly baqylaýshyǵa habarlaıdy. Ol alǵashqy medısınalyq járdem shaqyrady. Kelgen jedel járdem Aǵadildiń kóz jumǵanyn tirkeıdi. Teksergen kezde denesinen zorlyq-zombylyq belgileri anyqtalmady. Búginde oǵan júrek qan-tamyrlarynyń jetispeýshiligi dıagnozy qoıylyp otyr. Beınekamera onyń uıyqtap almaı, mazasyndanyp júrgenin kórsetti, – dep málimdegen bolatyn Zapparov.