«Qamshynyń» elektrondyq hat qorjynyna Qyzylorda oblysy Syrdarıa aýdany Naǵı İlıasov aýyldyq okrýgi ákimi apparatynan hat kelip tústi. Onda qoǵam belsendisi, ulttyq qoǵamdyq senim keńesiniń múshesi Muhtar Taıjan «yntymaǵy jarasqan aýylymyzdyń tynyshtyǵyn buzdy, saldarynan aýyl turǵyndary arasynda arazdyq týyndap, el dúrbeleńge tústi» delingen. Buǵan deıin Muhtar Taıjan atalǵan aýyl turǵyndary «egindik jerlerimizdi depýtat Abzal Eralıevtyń inisi Darhan Eralıevtan qaıtarýǵa kómektesýińizdi suraımyz» dep habarlasqanyn óziniń facebook paraqshasynda jazǵan bolatyn. «Qamshy» portaly ákimdikten kelip túsken hattyń mátinin esh ózgertpesten jarıalap otyr. Qarsy tarap – Muhtar Taıjannyń aıtary bolsa, ony da oqyrmanǵa usynýǵa ázir.

Qyzylorda oblysy, Syrdarıa aýdany N.İlıasov aýyly táýelsizdik alǵan 90-shy jyldary sharýasy turalap, qaryzǵa batqan shyǵyny mol eldi-meken edi.
2004 jyly sharýashylyqtyń tolyq bankrotqa ushyraýyna baılanysty oǵan tıesili jer aýmaqtary aýksıon arqyly egin egý maqsatynda aýylsharýashylyǵy kásipornyna satyldy.
Nátıjesinde kóp jyldyq qaryzy bar, tıimsiz dep tanylǵan N.İlıasov aýylyna tıesili egin alqaptaryna qaıta jan bitip, sharýashylyq qaıta túledi. Kúni búginge deıin 5000 ga jer ıgerilip, sharýshylyq jylyna 30 000 tonna kúrish ónimin berdi. Aýylda 2247 adam turady. "Abzal ı K" kompanıasy qaramaǵynda 400-ge jýyq qyzmetker jumys isteýde. Kompanıa jyl saıyn qazynaǵa 120 mln teńge salyq tóleıdi. Aýyl, aýdan aldyndaǵy barlyq áleýmettik mindetterin óteıdi.
A.Eralıev osy sharýashylyqqa basshylyq etken jyldary aýylda sport kesheni, stadıon, ákimshilik ǵımaraty, meshit qurylysyn júrgizdi. Mádenıet úıine, mektepke, balabaqshaǵa kúrdeli jóndeý jasaldy. Aýyl tolyq abattandyrylyp, respýblıkadaǵy eń úlgili aýylǵa aınaldy. Kompanıa jyl saıyn aýyldaǵy barlyq mádenıet, sporttyq, áleýmettik sharalarǵa demeýshilik kórsetip, qoldaıdy.
Aýylymyz yntymaǵy jarasqan, aýyzbirshilikte ómir súrip jatqan. Biraq, Muhtar Taıjan esimdi azamat kelip, sol tynyshtyqty buzdy. Saldarynan aýyl turǵyndary arasynda arazdyq týyndap, el dúrbeleńge tústi. Onysymen qoımaı osy aýyldyń ósip-órkendeýine tikeleı septigin tıgizgen azamat, QR Parlament májilisiniń depýtaty A.Eralıev myrzanyń ataq-abyroıyna nuqsan keltirdi.
Muhtar Taıjannyń jalpaq jurtqa jarıa etken maǵlumattary tekserilmegen. Naqty qujattarmen rastalmaǵan. Odan bólek, áleýmettik jelilerde jalǵan aqparat taratyp, aýyl turǵyndary qol qoıǵan degen aryz-shaǵymdy jarıalady. Biraq, onyń ózine aýyl turǵyndarynyń qatysy bolmaı shyqty. Ony turǵyndar naqtylaı alady.
N.İlıasov aýyldyq ákimdigi de halyq ta uzaq jyldar boıy qalyptasqan sharýashylyqtyń júıeli damýyna, turǵyndardyń alańsyz jumysyn istep, kóktemgi dala jumystarynyń daıyndalǵanyna múddelimiz. Eger qandaı da bir daý týyndaǵan jaǵdaıda zańdy tártippen qaraýǵa yqpal etýge daıynbyz.