Sırıanyń Idlıb aımaǵynda bolǵan áýe soqqysynyń saldarynan Túrkıa qarýly kúshteriniń 33 jaýyngeri qaza tapty. Bul jaıynda Túrkıanyń Hataı aımaǵyndaǵy úkimet ókilderi málimdedi, dep jazady dw.com.

Osydan keıin Túrkıa Respýblıkasynyń prezıdenti Redjep Taıyp Erdoǵan qaýipsizdik máseleleri boıynsha tótenshe jınalys ótkizdi. Artynsha Sırıa armıasynyń pozısıalary boıynsha Túrkıa áskeri soqqy jasady.

Daily Sabah gazetiniń málimdemesi boıynsha Túrkıa áskeri Idlıb aımaǵynyń shyǵysynda ornalasqan Sırıa áskeriniń qaraýyl jasaǵyn joıyp jibergen. Basylymnyń málimeti boıynsha, M-5 halyqaralyq avtojolyndaǵy ásker soqqyǵa dýshar boldy. Adam quqyqtary boıynsha sırıalyq monıtorıń ortalyǵynyń málimdeýinshe, Túrkıanyń qarýly kúshteriniń ushqyshsyz ushatyn apparattary men artılerıasy Sırıa armıasynyń aımaqtyń ońtústik jáne shyǵys jaqtaryn soqqyǵa alyp, jıyrmaǵa jýyq Sırıa áskeriniń kózin joıǵan. Túrkıanyń resmı ókilderiniń málimdemesinde Idlıb aımaǵymen shekaralas Túrkıanyń Hataı aımaǵynda Sırıa tarapynan jasalǵan áýe soqqylarynan soń 36 jaýynger jaralanǵany habarlanǵan.

Shabýyldan soń Grekıa Túrkıamen shekarasyndaǵy baqylaýdy kúsheıte bastady. Bolgarıanyń resmı ókilderi de Túrkıamen aradaǵy shekarany qatań baqylaýǵa alý úshin 1000-ǵa jýyq áskerin shekaraǵa jiberetinin málimdedi. Óıtkeni osy shabýyldan soń Túrkıa Respýblıkasynyń resmı ókilderi shabýylǵa Reseıdiń qarýly kúshteriniń ushaqtarynyń da qatysqanyn keltire otyryp, budan bylaı Sırıadan keletin bosqyndardy Eýropaǵa aǵylýyna kedergi bolmaıtynyn jetkizdi.

Al Eýro Odaq elderimen Túrkıa respýblıkasynyń arasynda 300 shaqyrymdyq shekara bar. NATO-nyń bas hatshysy Iens Stoltenberg Túrkıa qarýly kúshterine qarsy jasalǵan bul shabýyldy aıyptady.

Túrkıanyń Grekıa jáne Bolgarıa respýblıkalary arasyndaǵy shekarasyna bosqyndar aǵylyp kelýde. Túrkıada qazirdiń ózinde resmı málimetter boıynsha 3,6 mln sırıalyq bosqyn bar. Túrkıa halqy da bosqyndardan jalyqqanyn jasyrmaýda. Aımaqtaǵy jaǵdaı barynsha shıelenisýde. Bul Túrkıa-Sırıa qaqtyǵysy emes, bul endi Túrkıa-Reseı qaqtyǵysy sanalatyndaı jaǵdaıǵa jetti. Eýrazıanyń Orta Shyǵys aımaǵynda álemdik alpaýyt elderdiń múddeleri qaıtadan qaqtyǵysýy úlken soǵysqa aparýy ǵajap emes.