Naýryzdyń 3-i kúni Qazaqstan prezıdenti Qasym-Jomart Toqaev Nur-Sultanda Qytaı Kompartıasy saıası búrosynyń múshesi Ian Szechımen kezdesti. Bul týraly Aqorda saıty habarlady. 

Aqordanyń jazýynsha, Ian Szechı Toqaevqa Qytaı basshylyǵynyń koronavırýspen kúreske qarsy sharalary týraly baıandady. Al Toqaev Qytaıdyń koronavırýspen kúreste atqaryp jatqan jumystaryn joǵary baǵalap, Qazaqstan koronavırýspen birlesip kúresýge nıetti ekenin aıtty.

– Osyndaı qıyn sátte Qazaqstan Qytaı basshylyǵynyń naqty ári tabandy is-áreketterine jan-jaqty qoldaý bildiredi. Tóraǵa Sı Szınpınniń ózi aıtqandaı, bul qytaı halqynyń sońǵy jyldary bastan keship otyrǵan eń qıyn kezeńi. Ómirdiń ártúrli kezeńderinde kezdesetin osyndaı aýyrtpalyqtarmen birlesip kúresemiz dep oılaımyn. Eki memleket arasyndaǵy strategıalyq seriktestikti damytý jáne nyǵaıtý jolynda alǵa qadam basa beremiz, – dedi prezıdent.

Aqordanyń habarlamasyna qarǵanda, kezdesý barysynda qazaq-qytaı baılanystaryn nyǵaıtýdyń perspektıvalary, sondaı-aq, eki eldiń halyqaralyq arenadaǵy yqpaldastyǵy talqylandy.

– QHR Tóraǵasy Sı Szınpınniń sálemin jetkizýge ruqsat etińiz. Siz byltyr qyrkúıek aıynda Qytaıǵa alǵash ret memlekettik saparmen bardyńyz. Sol kezde QHR Tóraǵasymen birlesip jan-jaqty strategıalyq seriktestikti odan ári damytý týraly málimdeme jasap, qytaı-qazaq qatynastaryna tyń serpin berdińizder, – dedi Ian Szechı.