Áıgerim Jákisheva ákesiniń bostandyqqa shyqqanyna sene almaǵan. Bul týraly Muhtar Jákishevtiń qyzy 31 arnaǵa bergen suhbatynda aıtty. Áıgerim Jákisheva qazir London qalasynda turady. 

"Ákeme úkim oqylyp jatqan kezde bizde saǵat tańǵy alty bolatyn. Meniń telefonyma kóptegen hattar keldi. Tipti telefonym kelgen hattar men qońyraýlardan jarylýǵa jaqyn qaldy. Ákemniń bostandyqqa shyǵatynyn estigen kezde sene almadym. Buǵan senýge qoryqtym. Sebebi "qazir qýanyp, keıin taǵy bir oqıǵalar oryn alyp, ákemdi shyǵarmaı qoıady" dep oıladym. Men de, otbasym da qatty qýandy. Olar da qoryqty, sene almady. Biz endi 15 kún ishinde eshqandaı ózgeris bolmasa eken dep duǵa etemiz. Kimniń arqasynda meniń ákem bostandyqqa shyqty? Bul suraqqa jaýap berý óte qıyn. Eshkim bul suraqqa durys jaýap bere almaıtyn shyǵar. Al ákemdi alǵash ret kórgen kezde ne aıtatynymdy bilmeımin. Qatty qushaqtaıtyn shyǵarmyn", - dedi Áıgerim Jákisheva.

Eske salsaq, keshe "Qazatomónerkásip" kompanıasynyń burynǵy jetekshisi Muhtar Jákishevtiń soty boldy. Semeı qalalyq №2 soty shyǵarǵan sheshimge sáıkes, Muhtar Jákishev shartty túrde merziminen buryn bostandyqqa shyǵady. Ol probasıalyq baqylaýǵa alynyp, jaza merzimi tolyq aıaqtalmaıynsha Qazaqstan aýmaǵynan shyǵarylmaıdy.