Búgin Almaty qalasynda 10-ǵa jýyq belsendi "Nur Otan" partıasynyń fılıalyna baryp, partıa ókilderiniń jemqorlyqpen aıyptalǵanyn túsindirýdi talap etti. Bul týraly Azattyq habarlady.  Qańtar jáne aqpan aıynda "Nur otan" partıasynyń 2 ókili para alý boıynsha aıyptalǵany anyqtalǵan bolatyn. 

Jınalǵan top naýryz aıynda otstavkaǵa ketken eks-prezıdenttiń "Nur Otan" partıasyn basqaryp otyrǵanyna narazylyǵyn bildirdi. Olar Nazarbaevtyń otstavkaǵa ketýin talap etti. Partıa fılıalynyń aldyna jınalǵan belsendilerdiń qolynda "Stop Nazarbayev system" (Nazarbaev júıesi toqtasyn – Red.) dep jazylǵan plakat bolǵan.

Belsendilermen "Nur Otan" partıasy Almaty bólimshesi tóraǵasynyń birinshi orynbasary Stanıslav Kankýrov sóılesti. Kankýrov 2019 jyly jemqorlyq boıynsha myńnan astam adamnyń jaýapqa tartylǵanyn málimdedi. Sondaı-aq jaýapqa tartylǵandardyń 10 paıyzǵa jýyǵy "Nur Otan" partıasynyń múshesi ekenin aıtty. 

– Iá, partıa ókilderiniń jemqorlyqpen aıyptalǵany ras. Degenmen, partıa basshysynyń tapsyrmasymen, qatarymyzdy para alýshylardan "tazartatyn" bolamyz, - dedi Stanıslav Kankýrov. 

Kezdesý belsendi Ilıashev qolyndaǵy "Stop Nazarbayev system" dep jazylǵan plakatyn ashyp kórsetkennen keıin aıaqtaldy. Al Stanıslav Kankýrov plakatty búktep belsendige qaıtaryp berip, kezdesýdi toqtatatynyn aıtty. 

"Kankýrov jumystary bar ekenin aıtyp, bizdiń suraqtarymyzǵa tolyq jaýap bermedi. Biz suraq qoıýdy jalǵastyratyn bolamyz" dedi Ilıashev. Keıin belsendiler "Nazarbaev, ket" dep aıǵaılady. 

Eske salsaq, búgin "Nur Otannyń" saıası keńesi búrosynyń otyrysy jabyq túrde ótetini habarlandy.