Qytaıdyń Qazaqstandaǵy elshisi Chjan Sáo etnıkalyq qazaq Saıragúl Saýytbaıdyń "Batyr áıel" halyqaralyq syılyǵyn alýyna qatysty pikir bildirdi. Ol AQSH eliniń Saıragúl Saýytbaıdy marapattaýyn arandatýshylyq dep aıyptady. 

"Bul - Qytaı eliniń ishki isine aralasýǵa baǵyttalǵan provokasıa. Al is-sharanyń ózi Vashıngtonnyń qara nıeti men maqsatyn ashyq kórsetken sırkke uqsaıdy. Sońǵy jyldary Vashıngton Shyńjań-Uıǵyr avtonomdy aýdanyndaǵy terorızm jáne ekstremızmge qarsy kúreste qol jetkizgen zor jetistikterimizdi elemeı, Qytaıǵa jala jaýyp, túrli qaýeset taratyp, SHUAA máselesin kóterip keledi. Onyń maqsaty – óńirdi, sonyń ishinde SHUAA-ny etnıkaralyq, ultaralyq qantógis aımaǵyna aınaldyryp, bir-birimen arazdastyrý, aqyrynda Qytaıdyń túbine jetý. Biraq onyń bul áreketinen eshteńe shyqpaı keledi. 

SHUAA qaýipsiz, turaqty, kórkeıgen aımaqqa aınalǵan. Barlyq ult ókilderi beıbit ǵumyr keship keledi. Kásibı oqý ortalyqtaryn bitirgender jumysqa ornalasyp, aqsha taýyp júr. Ortalyqtar Qytaıdyń ekstremızmmen kúresý úshin oılap tapqan sátti jobasy ekenin tájirıbe kórsetti. Vashıngtonnyń bir ótirikti qaıtalaı berseń shyndyqqa aınalady degen birtúrli stereotıpi bar. Bul olardyń bilimsizdiginiń kórinisi. Ótirik aıtýdy toqtatyńdar. Ótirikti myń márte qaıtalasańdar da eshqashan shyndyqqa aınalmaıdy. Al AQSH osy marapat arqyly óziniń ıdeologıalyq vırýstyń eń úlken kózi ekenin taǵy bir ret kórsetti. 

Endi Qytaıda da, Qazaqstanda da "qylmysker" atanǵan áıeldi qalaısha batyr áıel deýge bolady?! Onyń batyldyǵy – óz Otanyn satý, ózi men otbasyn asyrap baqqan eldi qaralaý. Eger ol batyr áıel bolsa, nelikten SHUAA-daǵy nesıelerin tólemegen? Ol óziniń geosaıası sırktegi rólin laıyqty baǵalaı almaıtyny ókinishti", - dep jazdy Qytaı elshisi óziniń facebook paraqshasyna. 

Eske sala ketsek, 4 naýryzda saıragúl Saýytbaı AQSH-ta "Batyr áıel" halyqaralyq syılyǵynyń ıegeri atandy. Marapattaý kezinde Saıragúl Saýytbaıǵa AQSH-tyń memlekettik hatshysy alǵys aıtqan bolatyn.