Qazaqstan Respýblıkasynyń Úkimetine Qazaqstan Respýblıkasynyń Parlamentine Reseı Federasıasynyń Qazaqstan Respýblıkasyndaǵy Elshiligine Kóshirmesi: Reseı Federasıasynyń Qazaqstan Respýblıkasy, Almaty qalasyndaǵy Bas Konsýldyǵyna NARAZYLYQ Búgin, 2013-jyldyń 2-shildesinde, 8 saǵat 39 mınýtta Reseı Federasıasy jalǵa alyp otyrǵan "Baıqońyr" ǵarysh aılaǵynda búkil álem surapyl tehnogendik apattyń kýágeri boldy. Jer orbıtasyna "Glonass" júıesiniń bólshekterin alyp ushpaq bolǵan "Proton" zymyrany birneshe sekýndtardan soń qozǵaltqyshy isten shyǵyp, jerge qulady. Adam aǵzasy men qorshaǵan ortaǵa ólsheýsiz zıan ákeletin ýly otyn - "GEPTIL" topyraqqa tógilýi múmkin. Onyń kólemi 500 tonna degen málimet jarıa boldy! Bul ǵaryshtyq zymyran ushyrýda birinshi ret bolyp otyrǵan apat emes. Moraldyq turǵyda eskirgen, álemniń órkenıetti elderi qoldanýdy qoıǵan "geptıl" otynymen ushatyn "Proton" zymyrandary qazaq dalasyna san márte qulady. Odan tógilgen ýly zattardyń ekologıalyq, ekonomıkalyq zardabyn reseılik jáne qazaqstandyq bılik ókilderi ádeıi tómendetip, halyqtan jasyryp keledi dep esepteımiz. Bul joly da solaı bolýy ábden múmkin. Sondyqtan, Qazaqstan Respýblıkasynyń qarapaıym azamattary, mynany qatań talap etemiz: 1. Apat saldarlaryn zertteıtin Memlekettik komısıa óz jumysyn ashyq túrde júrgizýge tıis. Oǵan qoǵam ókilderi, dárigerler, ekologtar, ózge de tıisti mamandar tartylýy kerek. Komısıa esebi baspa betinde jarıalanýy mindetti. 2. Apattyń sebepteri tolyq anyqtalyp, apat saldarlary joıylǵanǵa deıin, ekonomıkalyq jáne ekologıalyq zardaptardyń orny toltyrylyp, jergilikti halyqqa tıisti kómek tolyq kórsetilgenge deıin bizdiń jerimizdegi "Baıqońyr" ǵarysh aılaǵynan zymyran ushyrý toqtatylsyn! 3. Jalpy alǵanda, biz "Baıqońyr" ǵarysh aılaǵyn jalǵa berý máselesi qaıta qaralýyn suraımyz. "Geptıl" jáne ózge de ýly zattardyń ekologıamyzdy lastaýyna túbegeıli qarsymyz. Bul bolǵan apat - Reseı Federasıasynyń Qazaqstan Respýblıkasy jerindegi "Baıqońyr" ǵarysh aılaǵymen qatar ózge de áskerı polıgondar máselesine jańasha qaraýǵa shaqyratyn úlken sebep dep bilemiz. Reseıdiń áskerı polıgondary - "Kapýstın Iar", "Sary Shaǵan", "Embi", ""Balqash-1", "Saryózek" t,b. áskerı maqsattaǵy nysandardyń jalǵa alý aqysy esh sebepsiz tómendetilgen jáne turǵylyqty halyqqa tıgizetin zalaly ólsheýsiz. Olar túgeldeı reseılik óktemdik negizinde ornalasyp otyrǵany anyq. Biz jalǵa tólengen eshqandaı aqsha, tipti mıllıardtar halyqqa shektirgen zıandy óteı alady dep oılamaımyz. Biz Qazaqstannyń jáne Reseıdiń bıliginen Qazaqstan Respýblıkasy jerindegi barlyq áskerı polıgondardy jabýdy talap etemiz! Respýblıkanyń barlyq azamattaryn, qoǵamdyq uıymdardy, saıası partıalardy osy talapty qoldaýǵa shaqyramyz! Qazaqstan azamattary: Muhtar TAIJAN Aıdos SARYM Qasym AMANJOLULY Aıdos JUQANULY Abzal QUSPAN Janat ESENTAI Berik SHADǴALI Dýman KÁKİM Edige AHMET Maqsat İLIASULY Samat NURTAZA Aman MÁMBETÁLİ Baqyt MUHTAR Erjan ALASH Aıgúl MAZAQBAI Álibı ÁRİP