Búgin senat tóraǵasy Darıǵa Nazarbaevanyń tóraǵalyǵymen QR parlamenti senatynyń búro otyrysy boldy. Bul týraly Parlament senatynyń baspasóz qyzmeti habarlady.

Qazaqstan Respýblıkasy prezıdentiniń «Qazaqstan Respýblıkasy joǵarǵy sotynyń sýdıalaryn saılaý týraly» usynysy kún tártibindegi alǵashqy másele boldy. Prezıdent usynǵan kandıdatýralar boıynsha qorytyndylar daıyndaý konstıtýsıalyq zańnama, sot júıesi jáne quqyq qorǵaý organdary komıtetine tapsyryldy.

Senat taǵaıyndaǵan QR konstıtýsıalyq keńesi múshesiniń ókilettigin toqtatý jáne qyzmetinen bosatý, sondaı-aq Konstıtýsıalyq Keńes múshesin qyzmetine taǵaıyndaý kún tártibindegi kelesi másele boldy.

Otyrys barysynda senat taǵaıyndaǵan QR ortalyq saılaý komısıasy múshesiniń ókilettigin toqtatý jáne qyzmetinen bosatý máselesi odan keıin qaraldy. Konstıtýsıalyq zańnama, sot júıesi jáne quqyq qorǵaý organdary komıtetine osy kandıdatýra boıynsha tıisti qorytyndy daıyndaý tapsyryldy. Búro músheleri odan basqa QR parlamenti Senaty Tóraǵasynyń «QR ortalyq saılaý komısıasynyń múshesi qyzmetine taǵaıyndaý týraly» usynýyn da qarady.

Búro otyrysynda májiliste maquldanǵan zań jobalary komıtetterge bólinip berildi. Áleýmettik-mádenı damý jáne ǵylym komıteti elimizdiń keıbir zańnamalyq aktilerine eńbek jáne ana men balany qorǵaý máseleleri boıynsha túzetýler engizý jobalary boıynsha bas komıtet bolyp belgilendi.

Búro otyrysy barysynda 12 jáne 19 naýryzda ótetin senattyń kezekti otyrystaryna daıyndyq talqylandy. Salalyq komıtetterdiń tóraǵalary otyrystarda qaraýǵa usynylǵan máselelerdiń daıyndyǵy týraly habardar etti.

Sondaı-aq búro músheleri senatta Shyǵys Qazaqstan oblysynyń kúnin ótkizýdi de talqylady. Darıǵa Nazarbaeva aımaqtar kúnderin ótkizýdiń basty mindeti – memlekettik baǵdarlamalardyń óńirlerdegi oryndalý deńgeıin aıqyndaý, halyqty tolǵandyratyn máselelerdi jergilikti bılikpen birlese otyryp sheshý joldaryn qarastyrý ekenin atap ótti.

Senat josparyna sáıkes bıylǵy 22 mamyrda «Qazaqstan Respýblıkasynda genderlik teńdik pen otbasylyq qundylyqtardy damytý» taqyryby boıynsha parlamenttik tyńdaýlar ótkizý josparlanǵan bolatyn. Ony uıymdastyryp ótkizý áleýmettik-mádenı damý jáne ǵylym komıtetine júkteldi.