Koronavırýs juqtyrǵandardyń sany ósken joq, stasıonarlyq karantınde 1 425 adam, úı karantıninde 496 adam jatyr, dep habarlady Qazaqstannyń densaýlyq saqtaý mınıstrligi.

– Búginde elimizde koronavırýs juqtyrǵan 6 naýqas tirkelgen: Almaty qalasynda – 4, Nur-Sultan qalasynda – 2 adam. Stasıonarlyq karantınde 1 myń 425 adam, úı karantıninde 496 adam jatyr, – delingen habarlamada.

Barlyq sanat boıynsha monıtorıńke 2 myń 507 adam alyndy, onyń ishinde 1 "a" sanaty boıynsha – 1 myń 619, 1 "b" sanaty boıynsha – 520, 2 sanat boıynsha – 368 adam. Monıtorıńke alynǵan 2 myń 507 adamnyń 424-cine baqylaý toqtatyldy. 15 naýryzdaǵy jaǵdaı boıynsha barlyǵy 2 myń 083 adamǵa baqylaý júrgizilýde.

– Qazirgi ýaqytta dene qyzýymen jáne JRVI belgilerimen 122 adam aýrýhanaǵa jatqyzyldy, onyń ishinde 1 "b" sanaty boıynsha – 35 adam; 2 sanat boıynsha – 42 adam; 3 sanat boıynsha - 45 adam. Aýrýhanaǵa jatqyzylǵandar sany 122 adam, 62 azamat shyǵaryldy. 60 adam stasıonarda qalady, – dep habarlady mınıstrlik.

Qazirgi tańda epıdemıaǵa qarsy qajetti sharalar, onyń ishinde oqshaýlaý, emdeý jáne dezınfeksıa jasaý jumystary júrgizilýde.