Qazaqstan Respýblıkasynda búgin, ıaǵnı 16 naýryz saǵat 08.00-den bastap tótenshe jaǵdaı kúshine endi. Ol boıynsha birneshe shara qabyldanǵan. Sonyń ishinde el aýmaǵyna kirý, elden shyǵýǵa shekteý qoıylǵan. Syrtqy ister mınıstri qandaı jaǵdaılarda memlekettik shekara arqyly kirip-shyǵýǵa bolatynyn málim etti.

1. Buryn shet memlekettiń aýmaǵyna shyqqan jáne Qazaqstan Respýblıkasyna qaıtyp kelgen Qazaqstan Respýblıkasynyń azamattary;

2. Densaýlyq saqtaý mekemeleriniń rastaıtyn qujattaryn usynyp, shetelge emdelýge shyǵatyn Qazaqstan Respýblıkasynyń azamattary;

3. Osyǵan deıin Qazaqstan Respýblıkasynyń aýmaǵyna kirgen jáne elden shyǵatyn sheteldikter;

4. Elimizdiń jáne shet memleketterdiń dıplomatıalyq qyzmet personaly jáne olardyń otbasy músheleri, sondaı-aq Qazaqstan Respýblıkasy Syrtqy ister mınıstrliginiń shaqyrýy boıynsha Qazaqstanǵa keletin shet memleketter men halyqaralyq uıymdar delegasıalarynyń músheleri;

5. Poezdyq jáne lokomotıv brıgadalarynyń, áýe jáne teńiz kemeleri ekıpajdarynyń músheleri; 

6. Qazaqstan Respýblıkasynyń aýmaǵyndaǵy sheteldik transshekaralyq qurylystarǵa qyzmet kórsetetin personal jáne shektes memleketterdiń aýmaǵyndaǵy qazaqstandyq transshekaralyq qurylystarǵa qyzmet kórsetetin personal; 

7. Shekteýlerdi engizgenge deıin (2020 jylǵy 16 naýryz saǵat 08.00-ge deıin) jolǵa shyqqan jáne tranzıttik jolaýshylar poezymen jolda kele jatqan sheteldikter; 

8. Qazaqstan Respýblıkasynyń aýmaǵynda turýǵa yqtıarhattary bar sheteldikter (azamattyǵy joq tulǵalar); 

9. Qazaqstan Respýblıkasy azamatynyń otbasy múshesi bolyp tabylatyn shet el azamaty (týystyq baılanys faktisi rastalǵan jaǵdaıda – jubaıy (zaıyby), olardyń ata-analary men balalary).