Bas prokýrordyń orynbasary Bolat Dembaev karantınge baılanysty málimdeme jasady. Bolat Dembaev karantınge baılanysty birqatar shara men ýaqytsha shekteý engizilgenin aıtty. Bul týraly bas prokýratýranyń baspasóz qyzmeti habarlady. 

"Koronavırýs pandemıasyna baılanysty Qazaqstan Respýblıkasynyń Prezıdenti eldiń búkil aýmaǵynda 2020 jyldyń 16 naýryzynan 15 sáýirine deıin tótenshe jaǵdaı engizý týraly Jarlyqqa qol qoıdy. Nur-Sultan jáne Almaty qalalarynda 2020 jylǵy  19 naýryzdan bastap karantın rejımi engizildi. Birqatar sharalar men ýaqytsha shekteýler belgilendi. Olardy oryndamaý ákimshilik jaýaptylyqqa ákep soqtyrady (ÁQBtK-niń 476-baby - 10 AEK aıyppul nemese 15 táýlikke deıin qamaqqa alý)" dedi Bolat Dembaev. 

Bolat Dembaevtyń aıtýynsha, tótenshe jaǵdaı kezinde bılik ókiliniń zańdy talabyna baǵynbaǵany úshin qylmystyq jaýaptylyq kózdelgen (Qylmysty kodekstiń 379-baby - 2 myń AEK aıyppuldan 2 jylǵa bas bostandyǵynan aıyrýǵa deıin).

– "Halyq densaýlyǵy jáne densaýlyq saqtaý júıesi týraly" Kodekstiń 90-babyna sáıkes azamattar medısınalyq uıymdardyń talap etýi boıynsha tekserýden jáne emdelýden ótýge mindetti. Bas memlekettik sanıtarlyq dárigerdiń 2020 jylǵy 16 naýryzdaǵy qaýlysymen stasıonarlyq jáne úı karantıni engizildi. Olardy iske asyrý maqsatynda ýákiletti organdar epıdemıologıalyq jaǵdaıy qolaısyz elderden kelgen adamdardy anyqtaý, oqshaýlaý jáne emdeý boıynsha sharalardy qamtamasyz etip jatyr, - deıdi Bas prokýrordyń orynbasary.

Shekteý is-sharalary, onyń ishinde karantın turǵyndardyń jáne menshik nysanyna qaramastan zańdy tulǵalardyń oryndaýy úshin mindetti. Alaıda karantınnen jaltarý, shetelge shyǵý týraly málimetterdi jáne baılanysta bolǵan adamdar týraly aqparatty jasyrý faktileri bar.

"Halyqtyń qaýipsizdigin qamtamasyz etý maqsatynda azamattardan ótkiziletin is-sharalarǵa túsinistikpen qaraýdy, Densaýlyq saqtaý mınıstrligi men İİM qyzmetkerleriniń zańdy talaptaryn saqtaýdy, olarǵa ınfeksıany anyqtaý men aldyn alýǵa kómek kórsetýdi suraımyz. Polısıanyń osyndaı talaptaryna baǵynbaǵany úshin ákimshilik jaýaptylyq kózdelgenin atap ótemiz (ÁQBtK-niń 667-baby - 40 AEK-ke deıin aıyppul nemese 10 táýlikke deıin qamaqqa alý). Sondaı-aq, sanıtarıalyq-epıdemıologıalyq qadaǵalaý organdarynyń nusqamalaryn oryndamaǵany (ÁQBtK-niń 462-babynyń 3-bóligi - 500 AEK-ke deıin aıyppul) jáne sanıtarıalyq erejeler men gıgıenalyq normalardy buzǵany úshin (ÁQBtK-tiń 425-baby - 5 mıllıon teńgege deıin aıyppul) ákimshilik jaýaptylyq belgilengen", - dedi Bolat Dembaev.

Bul rette kásipkerlik sýbektilerine qatysty qyzmetin toqtata turý túrindegi jaza qoldanylýy múmkin. Eger mundaı áreketter abaısyzda adamdardy jappaı juqtyrýǵa nemese adam ólimine ákep soqsa, onda qylmystyq jaýaptylyq týyndaıdy (QK-niń 304-baby - 2 myń AEK aıyppuldan 10 jylǵa bas bostandyǵynan aıyrýǵa deıin).

"Sonymen qatar, shyndyqqa sáıkes kelmeıtin málimetterdi taratpaýǵa jáne arandatýshylyqqa berilmeýge shaqyramyz. Aǵymdaǵy jaǵdaı týraly shynaıy aqparat ýákiletti memlekettik organdardyń resmı Internet-resýrstarynda ornalastyrylady", - dedi Dembaev.