Koronavırýsqa baılanysty jalǵan aqparat taratqan kúdikti anyqtaldy. Bul týraly Túrkistan oblysy polısıa departamentiniń baspasóz qyzmeti habarlady. 

"WhatsApp messendjeri arqyly beıtanys tulǵalar koronavırýsty juqtyrǵan degen Keles aýdanynyń turǵyny týraly jalǵan aqparat taratylyp jatqany boıynsha habarlama kelip tústi. Atalǵan jaıtty polıseıler QR qylmystyq kodeksiniń 274-baby 2-bóligi "kórineý jalǵan aqparat taratý" boıynsha SDTBT-ǵa tirkeldi" delingen aqparattyq habarlamady.

– Tekserý barysynda belgili bolǵandaı, jelide taralǵan aýdıohabarlamadaǵy áıel 10.03.2020 j Máskeý-SHymkent reısimen Germanıadan ushyp keldi. Áýejaıda ony medısına qyzmetkerleri qarsy alyp, Shymkent qalasyndaǵy páterine úı jaǵdaıyndaǵy karantınge jatqyzǵan. Qazirgi ýaqytta áıel ambýlatorıalyq em qabyldaýda. Onyń densaýlyǵyna tónip turǵan qaýip joq, – dedi oblystyń polısıa departamenti.

Jábirlenýshi akýsher-gınekolog polısıaǵa jalǵan aqparat taratýshylardy jaýapkershilikke tartý týraly ótinishin bildirgen bolatyn. Osylaısha 18.03.2020 j. jedel-izdestirý is-sharasy barysynda, Keles APB-nyń polısıa qyzmetkerleri jalǵan aqparat taratýshyny anyqtady. Azamatsha Saryaǵash aýdanynyń turǵyny bolyp shyqty. Qazirgi tańda ol óz áreketin tolyq moıyndap, qylmys jasaǵanyna ókinetinin vıdeo arqyly jetkizdi.

Departamenttiń aıtýynsha, qazir atalǵan jaıt boıynsha sotqa deıingi tergeý amaldary júrgizilýde. Saraptama taǵaıyndaldy. Kúdikti qolhatta.