Almaty qalasy boıynsha koronavırýstyq ınfeksıanyń taralýyn boldyrmaý jónindegi qalalyq shtabtyń otyrysynda 19 naýryzda COVID-2019 oshaǵy aımaǵynda ishki karantın engizý týraly sheshim qabyldandy, dep habarlaıdy ákimdiktiń baspasóz qyzmeti.

20 naýryzdaǵy jaǵdaı boıynsha Almatyda koronavırýstyq ınfeksıany juqtyrǵan 22 jaǵdaı tirkeldi. Barlyǵy zerthanalyq túrde rastaldy. Almaty qalasy aýmaǵyndaǵy epıdemıologıalyq tekserý nátıjeleri boıynsha COVID-2019-dyń 10 oshaǵy anyqtaldy:
- Almaly aýdany – 3;
- Medeý – 3;
- Túrksib – 2;
- Jetisý – 1;
- Alataý – 1.

Barlyq oshaqta indettiń odan ári taralýynyń aldyn alý maqsatynda epıdemıaǵa qarsy jáne profılaktıkalyq is-sharalar kúsheıtildi. Medısına qyzmetkerleri oshaq aımaǵynda ornalasqan barlyq tulǵalardyń jaǵdaıyna monıtorıń júrgizýde.

COVID-19 indetiniń tirkelgen oqıǵalaryna jáne ınfeksıanyń taralý sıpatyna qosymsha taldaý júrgizgennen keıin jáne epıdemıologtardyń qorytyndysyn negizge ala otyryp, oshaq aımaǵynyń shekarasy kóppáterli úıdiń kire berisine deıin jáne turǵyn úı aýmaǵyndaǵy jekemenshiktegi úıge deıin qysqartyldy. Osyǵan oraı úıler men páterlerdi kvartal boıynsha karantındeý boıynsha buǵan deıin qabyldanǵan sheshim kúshin joıady.

Jalpy ınfeksıa 1-1,5 metr qashyqta turǵan naýqas adamnyń sóıleýi, túshkirýi men jóteli arqyly beriledi. SOVID-2019 indetin juqtyrǵan adam otbasyndaǵy, jumystaǵy, qoǵamdyq kólikte, qonaqta jáne basqa da qoǵamdyq oryndarda aınalasyndaǵylardy tek tyǵyz baılanysta bolý arqyly juqtyrýy múmkin. COVID-2019 vırýsynyń qorshaǵan ortada tózimdiligi tómen bolǵandyqtan 1 saǵattan artyq ómir súre almaıdy. Sol sebepti COVID-2019 juqtyrǵan naýqaspen tyǵyz baılanys ornatpaǵan úıler men páterlerdi karantınge jabýdyń qajeti joq. Infeksıanyń taralýyn toqtatý boıynsha epıdemıaǵa qarsy sharalar tómendegideı:

- indetti juqtyrýshyny stasıonarǵa oqshaýlaý;
- naýqaspen baılanysta bolǵandy úı karantınine jabý;
- ınfeksıanyń berilý joly boıynsha árkim jeke gıgıenany saqtap, betperde kıýi qajet.

Oshaq aımaǵynda ornalasqan úılerdiń turǵyndary syrtqa tek qajettiligi boıynsha jáne medısına men polısıa qyzmetkeriniń birge jiberiledi. Barlyq azyq-túlik dúkenderi men dárihanalar kúsheıtilgen sanıtarlyq-epıdemıologıalyq jaǵdaıda jumysyn jalǵastyrýda. Sonymen qatar, aýdan ákimdikteri halyqtyń áleýmettik osal toptaryna kómek kórsetýde. Oshaq aımaǵynda ornalasqan turǵyndar arasynda túsindirý jumystary júrgizilýde.