Nur-Sultanda vırýs tabylǵan 28 adamnyń ishinde kámlet jasyna tolmaǵan eki adam bar. Onyń biri – tórt aılyq sábı, ekinshisi – 14 jasar jasóspirim. Bul týraly qalalyq densaýlyq basqarmasy habarlady.

Olardyń dereginshe, vırýs juqtyrǵan 28 adamnyń 18-i 30 ben 49 jastaǵylar. Tórt adam 50-59 jas aralyǵyndaǵylar bolsa, úsh adamnyń jasy 18-29 aralyǵynda. 60 jastan asqan bir adam ǵana vırýs juqtyrǵan. 

Basqarmanyń málimetinshe, vırýs juqtyrǵandardan bólek,  qazir qalada 645 adam aýrýhanada karantınde jatyr. 

Resmı aqparat boıynsha, Qazaqstanda vırýs juqtyrǵan 53 adam anyqtaldy. Nur-Sultanda – 28 adam, Almatyda – 22 adam, Qaraǵandyda – 2 adam, Almaty oblysynda 1 adam emdelip jatyr.

Qazaqstanda Covid-19 koronavırýsyn juqtyrǵandar alǵash ret 13 naýryzda anyqtalǵan. Keıin, 15 naýryzda – vırýs juqtyrǵandar sany segiz adamǵa jetkende prezıdent Qasym-Jomart Toqaevtyń jarlyǵymen elde 16 naýryz tańǵy segizden 15 sáýir tańǵy jetige deıin tótenshe jaǵdaı jarıalanǵan bolatyn. Al 19 naýryzdan bastap eldiń eki iri qalasy – Nur-Sultan men Almaty karantınge jabyldy. 

Sońǵy aqparat boıynsha, dúnıejúzinde  275 myńnan astam adam koronavırýs juqtyryp,11 myńnan astam adam vırýstan qaıtys bolǵan. Vırýs taralǵan elder sany 180-nen asty.